سمندری طوفان ارنب کے باعث اڈیشہ میں شدید بارش کا امکان

بھونیشور، شدید سمندری طوفان ‘ارنب کے باعث اڈیشہ میں بڑے پیمانے پر بارش ہوئی ہے اور اب یہ شمال کی جانب بڑھتے ہوئے مسلسل کمزور پڑ رہا ہے۔
محکمہ موسمیات (آئی ایم ڈی) نے جمعرات کو بتایا کہ سمندری طوفان ارنب گزشتہ 6 گھنٹوں کے دوران تقریباً 23 کلومیٹر فی گھنٹہ کی رفتار سے شمال کی جانب بڑھا۔ یہ چھتیس گڑھ کے وسطی حصوں اور اڈیشہ سے متصل علاقوں کے اوپر مرکوز تھا۔ اس کا مرکز ٹِٹلاگڑھ سے تقریباً 170 کلومیٹر مغرب اور سمبل پور سے 270 کلومیٹر مغرب-جنوب مغرب میں واقع تھا۔
محکمہ موسمیات نے بتایا کہ اس موسمی نظام کے شمال کی جانب بڑھتے رہنے اور 29 اکتوبر کی شام تک شمالی چھتیس گڑھ اور اس سے متصل شمال مغربی اڈیشہ کے اوپر ایک واضح کم دباؤ والے علاقے میں کمزور پڑ جانے کے قوی امکانات ہیں۔اس دوران جمعرات کو جنوبی انڈمان سمندر اور اس سے متصل علاقوں کے اوپر ایک اور کم دباؤ کا علاقہ بنا ہوا تھا۔ اس کے مغرب-شمال مغرب کی جانب بڑھنے اور 31 اکتوبر کے آس پاس جنوب مشرقی خلیج بنگال، انڈمان و نکوبار جزائر سے متصل علاقوں اور انڈمان سمندر کے اوپر ہوا کے کم دباؤ کے شدید نظام میں تبدیل ہونے کا امکان ہے۔
محکمہ موسمیات نے کہا کہ اگلے 2 دنوں کے دوران اس موسمی نظام کے مزید شدت اختیار کرنے اور مغرب-شمال مغرب کی جانب آندھرا پردیش کے ساحل کی طرف بڑھتے رہنے کے امکانات ہیں۔
محکمہ موسمیات نے بتایا کہ جمعرات کی صبح 8:30 بجے تک گزشتہ 24 گھنٹوں کے دوران اڈیشہ میں بڑے پیمانے پر بارش ریکارڈ کی گئی۔ ریاست کے کئی مقامات پر شدید سے انتہائی شدید بارش ہوئی، جبکہ جنوبی اڈیشہ کے بعض مقامات پر 21 سینٹی میٹر یا اس سے زیادہ غیر معمولی شدید بارش ریکارڈ کی گئی۔