میک ان انڈیا مہم کو رفتار فراہم کرنے کے لیے تکنیکی تعلیم ایک ذریعہ ہونا چاہیے: مشرا
جے پور، مارچ۔ راجستھان کے گورنر کلراج مشرا نے کہا ہے کہ تکنیکی تعلیم کو ملک میں میک ان انڈیا مہم کو تیز کرنے کے لیے ایک موثر ذریعہ بننا چاہیے۔مسٹر مشرا آج بیکانیر ٹیکنیکل یونیورسٹی کے پہلے کانووکیشن میں راج بھون سے آن لائن خطاب کررہے تھے۔ انہوں نے کہا کہ ٹیکنیکل یونیورسٹیوں کو چاہیے کہ وہ ایسے آلات، مکینیکل ٹیکنالوجی تیار کریں جس کی مدد سے لوگ اپنی صنعتیں لگا کر معیشت کو مضبوط کرنے میں اپنا حصہ ڈال سکیں۔انہوں نے کہا کہ ٹیکنالوجی کے میدان میں ہندوستان ویدک دور سے ہی بہت خوشحال رہا ہے۔ ویدک گرنتھوں میں روشنی کی رفتار، کشش کی قوت، ایٹم وغیرہ کے بارے میں بہت زیادہ علم موجود ہے۔ انہوں نے نئی تعلیمی پالیسی کے تحت قدیم علمی حوالوں کے ساتھ جدید عالمی علم کو ہم آہنگ کرتے ہوئے ٹیکنالوجی کی ترقی کو تیز کرنے پر زور دیا۔مسٹر مشرا نے کہا کہ انگریزی کے ساتھ ہندی اور دیگر ہندوستانی زبانوں میں سائنسی، تکنیکی اور طبی تعلیم کے کورسز کو قابل رسائی بنانے کی جو پہل انڈین انسٹی ٹیوٹ آف ٹرانسلیشن اینڈ انٹرپریٹیشن کے ذریعے کی گئی ہے، وہ قابل ستائش ہے۔ انہوں نے کہا کہ آئی آئی ٹی اداروں میں بھی کورسز کو ہندی اوردیگر زبانوں میں ترجمہ کا کام بھی پچھلے کچھ وقت سے شروع ہوا ہے، جس کے دور رس نتائج برآمد ہوں گے۔انہوں نے اس بات پر خوشی کا اظہار کیا کہ یونیورسٹی میں 1500 سے زائد کمپنیوں کی جانب سے کیمپس انٹرویوز میں 5000 سے زائد ملازمتوں کی پیشکشیں دستیاب ہوئیں۔نیشنل بورڈ آف ایکریڈیشن، نئی دہلی کے سابق چیئرمین پروفیسر۔ کرشنا کشور اگروال نے تکنیکی تعلیم کے تناظر میں نئی تعلیمی پالیسی کے خصوصی پہلوؤں پر روشنی ڈالی۔ انہوں نے کہا کہ طلباء اپنے مضمون کے علاوہ دیگر مضامین کی بنیادی معلومات بھی حاصل کر سکیں اس کے لئے نئی تعلیمی پالیسی میں مناسب التزامات کیے گئے ہیں۔وائس چانسلر پروفیسرامبریش شرن نے یونیورسٹی کی ترقی کی رپورٹ پیش کرتے ہوئے کہا کہ سال 2017 میں قائم اس یونیورسٹی کےچار حلقوں اور 42 الحاق شدہ کالجوں میں اس وقت 16 ہزار طلباء زیر تعلیم ہیں۔ انہوں نے کہا کہ یہ یونیورسٹی تکنیکی تعلیم کے میدان میں نئی تعلیمی پالیسی کو نافذ کرنے والی ریاست کی پہلی یونیورسٹی بن گئی ہے۔کانووکیشن کی تقریب میں بہترین تعلیمی کارکردگی کا مظاہرہ کرنے والے طلباء کو گولڈ میڈلز اور 2 ہزار 182 طلباء کو گریجویٹ اور پوسٹ گریجویٹ ڈگریاں دی گئیں۔
