ثانیہ مرزا ابوظہبی اوپن کے پہلے راؤنڈ میں باہر

ابوظہبی، فروری۔ہندوستانی ٹینس کھلاڑی ثانیہ مرزا اور ان کی امریکی ڈبلز پارٹنر بیتھانی میٹیک سینڈز ابوظہبی اوپن ڈبلیو ٹی اے 500 ٹینس ٹورنامنٹ سے باہر ہو گئیں۔ یہ ہندوستانی اسٹار کے کیریئر کا آخری میچ تھا۔ ثانیہ اور بیتھانی کو پیر کو خواتین کے ڈبلز کے پہلے راؤنڈ میں بیلجیئم-جرمن جوڑی کارسٹن فلپکنز اور لورا سیگمنڈ کے ہاتھوں 3-6 4-6 سے شکست کا سامنا کرنا پڑا۔ اس شکست کے ساتھ ہی چھ بار کی گرینڈ سلیم فاتح ثانیہ اپنی ریٹائرمنٹ کے قریب پہنچ گئیں۔ انہوں نے 27 فروری سے شروع ہونے والی دبئی ٹینس چیمپئن شپ کے بعد ریکیٹ چھوڑنے کا اعلان کیا تھا، جہاں وہ خواتین کے ڈبلز میں ایک اور امریکی میڈیسن کیز کے ساتھ شراکت کریں گی۔ پچھلے مہینے، ثانیہ نے آسٹریلین اوپن میں مکسڈ ڈبلز رنر اپ کے طور پر اپنے شاندار گرینڈ سلیم کیریئر کا خاتمہ کیا۔ ہندوستانی کھلاڑی اور پارٹنر روہن بوپنا کو برازیلی جوڑی لوئیسا اسٹیفانی اور رافیل ماتوس کے ہاتھوں 7-6(2),6-2 سے شکست کا سامنا کرنا پڑا۔ دلچسپ بات یہ ہے کہ ثانیہ نے 2009 میں میلبورن پارک میں اپنا پہلا میجر جیتا جب اس نے مہیش بھوپتی کے ساتھ جوڑی بنائی۔ انہوں نے اسی مقام پر اپنے شاندار گرینڈ سلیم کیریئر کا خاتمہ کیا۔ 2009 سے 2016 تک، ثانیہ مرزا نے چھ گرینڈ سلیم ڈبلز ٹائٹل جیتے، جن میں تین خواتین ڈبلز اور مکسڈ ڈبلز شامل ہیں۔ 2015 میں، وہ خواتین کی ڈبلز رینکنگ میں عالمی نمبر 1 بھی بن گئیں۔ ثانیہ نے آسٹریلین اوپن مکسڈ ڈبلز فائنل کے بعد کہا کہ میرے پیشہ ورانہ کیریئر کا سفر 2005 میں میلبورن میں شروع ہوا جب میں نے 18 سال کی عمر میں تیسرے راؤنڈ میں سرینا ولیمز کے خلاف کھیلا۔ "مجھے یہاں بار بار آنے اور یہاں کچھ ٹائٹل جیتنے کا اعزاز حاصل ہوا ہے۔ میرا گرینڈ سلیم کیریئر ختم کرنے کے لیے اس سے بہتر کوئی جگہ نہیں ہے۔