تمل ناڈو میں آر ایس ایس کے روٹ مارچ کے خلاف عرضی پرسپریم کورٹ جمعہ کو سماعت کرے گی

نئی دہلی، مارچ ۔سپریم کورٹ نے بدھ کو کہا کہ پورے تمل ناڈو میں راشٹریہ سویم سیوک سنگھ (آر ایس ایس) کو ‘روٹ مارچ کرنے کی مدراس ہائی کورٹ کی اجازت کو چیلنج دینے والی ریاستی حکومت کی درخواست پر جمعہ کو سماعت کرے گی ۔چیف جسٹس ڈی وائی چندرچوڑ اور جسٹس پی ایس نرسمہا کی بنچ نے ‘خصوصی تذکرہ کے دوران ابتدائی سماعت کے لیے، تمل ناڈو حکومت کی طرف سے پیش ہونے والے سینئر وکیل مکل روہتگی کی درخواست کو قبول کرتے ہوئے، 3 مارچ کو معاملے کی فہرست بنانے پر اتفاق کیا۔ بنچ کے سامنے بحث کرتے ہوئے مسٹر روہتگی نے کہا کہ ریاستی حکومت بم دھماکوں اور ممنوعہ تنظیم پاپولر فرنٹ آف انڈیا(پی ایف آئی) کی سرگرمیوں سے متاثرہ چھ اضلاع میں ‘مارچ پر پابندی لگانا چاہتی ہے۔سینئر وکیل روہتگی نے کہا کہ ہائی کورٹ کی سنگل بنچ نے ہمارے (ریاستی حکومت کے) دلائل سے اتفاق کیا، لیکن ڈویژن بنچ نے توہین عدالت کی درخواست پر سماعت کرتے ہوئے اسے (روٹ مارچ) کی اجازت دی۔سپریم کورٹ کے سامنے اپنی اپیل میں، جو ایڈوکیٹ جوزف ارسطو کے ذریعے دائر کی گئی تھی، تمل ناڈو حکومت نے دلیل دی کہ اس طرح کے مارچ کی اجازت دینے سے ریاست میں امن و امان سمیت دیگر مسائل پیدا ہو سکتے ہیں۔ درخواست میں کہا گیا ہے کہ ‘مارچ’ کے خلاف ریاست کا فیصلہ آئین کے آرٹیکل 19(2) کے تحت امن و امان کو برقرار رکھنے کے لیے بنیادی حقوق پر معقول پابندیوں کے اندر تھا۔ریاستی حکومت نے اپنی درخواست میں ستمبر 2022 میں پی ایف آئی پر پابندی کے پیش نظر عوامی پریشانی کے اندیشے سے متعلق رپورٹوں کا بھی حوالہ دیا ہے۔مدراس ہائی کورٹ کی سنگل بنچ کے فیصلے کو آر ایس ایس نے دو ججوں کی بنچ کے سامنے چیلنج کیا تھا۔ جسٹس آر مہادیون اور جسٹس محمد شفیق کی بنچ نے گزشتہ ماہ اپنے حکم میں آر ایس ایس کی عرضی کو قبول کرتے ہوئے اسے روٹ مارچ کرنے کی اجازت دی تھی۔ہائی کورٹ کی دو ججوں کی بنچ نے اپنے حکم میں یہ بھی کہا کہ ریاست کو شہریوں کے اظہار رائے کی آزادی کے حق کو برقرار رکھنا چاہیے۔