بی ڈبلیو ایف ورلڈ ٹور فائنل ڈرا کا اعلان، سندھو کو ملا آسان ڈرا

بالی، نومبر۔ورلڈ بیڈمنٹن فیڈریشن (بی ڈبلیو ایف) نے منگل کو بی ڈبلیو ایف ورلڈ ٹور فائنل کے ڈرا کا اعلان کیا۔ انڈونیشیا کے بالی میں بدھ سے شروع ہونے والے اس ٹورنامنٹ میں تجربہ کار ہندوستانی بیڈمنٹن کھلاڑی پی وی سندھو کو آسان ڈرا ملا ہے ۔ وہ گروپ اے میں آل انڈیا اوپن بیڈمنٹن چیمپئن شپ کی رنر اپ تھائی لینڈ کی پورنپاوی چوچوونگ، جرمنی کی ایون لی اور ڈنمارک کی لین کرسٹوفرسن کے ساتھ خواتین کے سنگلز میں مقابلہ کرتی نظر آئیں گی۔سندھو کا ان تینوں کھلاڑیوں کے خلاف اور اس مقابلے میں بہت اچھا ریکارڈ رہاہے۔ وہ واحد ہندوستانی ہیں جنہوں نے 2018 میں پہلی بار بی ڈبلیو ایف ورلڈ ٹور فائنلز کا خطاب جیتا تھا۔ اس کے بعد سے کوئی بھی ہندوستانی کھلاڑی یہ خطاب نہیں جیت سکا ہے۔سندھو کے علاوہ اس مقابلے میں کل سات ہندوستانی بیڈمنٹن کھلاڑی حصہ لیں گے۔ ساتوک سراج رینکیریڈی اور چراغ شیٹی مردوں کے ڈبلز میں اپنا دعویٰ پیش کریں گے۔ یہ پہلا موقع ہے جب ہندوستان کی ڈبلز جوڑی مقابلے میں حصہ لے گی۔ ساتوک-چراگ کی جوڑی کا مقابلہ عالمی نمبر ایک مارکس گیڈون اور کیون سوکامولزو، کم اسٹرپ اور اینڈرس راسموسن اور اولمپک چیمپئن جوڑی لی یانگ اور وانگ چی لن سے ہوگا۔