جموں و کشمیر کی صورتحال پر بات کریں گے، شکایت نہیں کریں گے: عمر عبداللہ

سرینگر، 19 اگست جموں و کشمیر کے وزیر اعلیٰ عمر عبداللہ نے بدھ کے روز کہا کہ جموں و کشمیر سے متعلق مسائل کو مرکز کو حل کرنا ہے، واشنگٹن کو نہیں۔ انہوں نے واضح کیا کہ وہ اپنے طے شدہ ملاقات کے دوران امریکی سفیر سے کسی قسم کی شکایت نہیں کریں گے۔
امریکی سفیر سرجیو گور بدھ کو جموں و کشمیر کے اپنے پہلے دورے پر سری نگر پہنچنے والے ہیں۔ دورے کے دوران وہ لیفٹیننٹ گورنر منوج سنہا اور وزیر اعلیٰ عمر عبداللہ سے ملاقات کریں گے۔صحافیوں سے گفتگو کرتے ہوئے عمر عبداللہ نے کہا کہ وہ امریکی سفیر کے ساتھ جموں و کشمیر اور خطے کی موجودہ صورتحال پر تبادلہ خیال کریں گے، تاہم نہ تو ان سے کوئی شکایت کریں گے اور نہ ہی مسائل کے حل کے لیے ان سے مدد طلب کریں گے۔
وزیر اعلیٰ نے کہا کہ طویل وقفے کے بعد امریکی سفیر کے ساتھ ان کی ملاقات ہونے جا رہی ہے اور وہ اس گفتگو کے منتظر ہیں۔ انہوں نے کہا، ’’میں ان کی بات زیادہ سننا پسند کروں گا، لیکن وہ بھی میری بات سننے آرہے ہیں۔ دیکھتے ہیں کہ کس نوعیت کی گفتگو ہوتی ہے۔‘‘عمر عبداللہ نے بدھ کی صبح سری نگر کا دورہ بھی کیا اور مختلف ترقیاتی منصوبوں پر جاری کام کا جائزہ لیا۔ انہوں نے کہا کہ جن منصوبوں کا انہوں نے معائنہ کیا، ان میں سے زیادہ تر پر کام تسلی بخش انداز میں جاری ہے، تاہم بعض منصوبوں کو انتظامیہ کی جانب سے مزید توجہ اور رفتار دینے کی ضرورت ہے۔بی جے پی کی جانب سے تقرریوں میں مبینہ بدعنوانی کے الزامات سے متعلق سوال پر وزیر اعلیٰ نے کہا کہ پولیس، کرائم برانچ اور اینٹی کرپشن بیورو ان کے براہ راست کنٹرول میں نہیں ہیں۔انہوں نے کہا کہ اگر واقعی کسی معاملے میں بدعنوانی ہوئی ہے تو اس کی مکمل تحقیقات ہونی چاہیے، مقدمہ درج کیا جانا چاہیے اور اگر کوئی شخص قصوروار پایا جاتا ہے تو اس کے خلاف قانون کے مطابق کارروائی ہونی چاہیے۔