کھرگے پر دلت ذہنیت سے متعلق تبصرے پر پون کھیڑا نے سنگیت راگی کی مذمت کی

نئی دہلی، 19 اگست
کانگریس کے میڈیا ڈپارٹمنٹ کے صدر پون کھیڑا نے دہلی یونیورسٹی کے پروفیسر سنگیت راگی کی جانب سے کانگریس صدر ملکارجن کھرگے کے بارے میں کیے گئے تبصرے کی مذمت کی ہے۔ کھیڑا نے کہا کہ ’دلت‘ صرف ایک سیاسی لفظ نہیں ہے بلکہ یہ ان برادریوں کی سماجی شناخت ہے، جنہیں نسلوں تک ذات پات پر مبنی امتیاز، استحصال اور ظلم و ستم کا سامنا کرنا پڑا ہے۔
کھیڑا نے بدھ کے روز سوشل میڈیا پلیٹ فارم ایکس پر پروفیسر راگی کی ایک ٹی وی مباحثے کے دوران کی گئی گفتگو پر اعتراض کیا۔ کھیڑا نے کہا کہ کسی شخص کی جانب سے ’دلت‘ کو صرف سیاسی اصطلاح قرار دینا اس سماجی حقیقت کو مٹانے کی کوشش ہے، جس کا دلت برادریوں نے طویل عرصے تک سامنا کیا ہے۔

انہوں نے کہا کہ دلت لفظ کو صرف انتخابی شناخت کے طور پر دیکھنا تاریخ، توہین، جدوجہد اور سماجی مزاحمت کی حقیقت کو نظرانداز کرنا ہے۔ ایسی سوچ سماجی حقیقت کو مٹانے کی کوشش ہے۔

کانگریس رہنما ن ے اس تبصرے کو لے کر بھارتیہ جنتا پارٹی کو بھی نشانہ بنایا۔ انہوں نے کہا کہ کھرگے کے خلاف بار بار کیے جانے والے ایسے تبصروں پر وزیر اعظم نریندر مودی اور راشٹریہ سویم سیوک سنگھ کے سربراہ موہن بھاگوت کو معافی مانگنی چاہیے۔

قابل ذکر ہے کہ ایک ٹی وی مباحثے میں پروفیسر راگی نے یوم آزادی کے موقع پر کانگریس ہیڈکوارٹر میں وندے ماترم کے دوران پیدا ہونے والی مبینہ بے چینی پر گفتگو کرتے ہوئے کہا تھا کہ ”کھرگے کو کیا ہوگیا تھا؟ یہ ان کی غلامی اور دلت ذہنیت کی شناخت ہے۔ یہی اصل دلت ذہنیت ہے۔“ مباحثے میں دیگر افراد نے جب راگی کی اس بات سے اختلاف کیا تو انہوں نے اپنا بیان واپس لے لیا۔