مرکز ’اگنی پتھ یوجنا‘ سے نوجوانوں کو ہراساں کررہا ہے: چوٹالہ

سرسہ، جولائی۔انڈین نیشنل لوک دل (آئی این ایل ڈی) کے پرنسپل جنرل سکریٹری اور ایم ایل اے ابھے سنگھ چوٹالہ نے کہا کہ مرکزی حکومت کسان اور نوجوان مخالف ہے۔ پہلے زرعی قوانین کی آڑ میں کسانوں کو ہراساں کیا جارہا تھا، اب اگنی پتھ اسکیم کے تحت نوجوانوں کو ہراساں کیا جا رہا ہے۔ آئی این ایل ڈی کی یوتھ یونٹ پوری ریاست کے ہر گاؤں سے مذمتی تحریک پاس کرے گی اور اس اسکیم کو منسوخ کرنے کے لیے وزیر اعظم کو بھیجے گی۔ مسٹر چوٹالہ اتوار کو یہاں پارٹی کی قومی اور ریاستی ایگزیکٹو میٹنگ سے خطاب کر رہے تھے۔ اس میٹنگ میں آئی این ایل ڈی کے سابق ممبران پارلیمنٹ، سابق ایم ایل اے، ریاستی ایگزیکٹو ممبران، ضلع صدور، صدور اور حال ہی میں ختم ہونے والے بلدیاتی انتخابات کے امیدواروں نے شرکت کی۔ میٹنگ میں اگنی پتھ اسکیم اور غذائی اجناس اور دیگر ضروری اشیاء پر 5 فیصد جی ایس ٹی میں حالیہ اضافہ کی تنقید کرتے ہوئے مذمتی تحریکیں منظور کی گئیں۔ مسٹر چوٹالہ نے کہا کہ وزیر اعظم مودی نے جرمن ڈکٹیٹر ہٹلر کے نقش قدم پر چلتے ہوئے اگنی پتھ اسکیم تیار کی ہے۔ اس اسکیم میں بھرتی کیے گئے نوجوان ملک کی حفاظت کے بجائے آر ایس ایس کی حفاظت کے لیے تیار کئے جائیں گے۔ اس اسکیم کے تحت ہونے والی بھرتیوں پر سوال اٹھاتے ہوئے انہوں نے الزام لگایا کہ منصفانہ اور میرٹ پر مبنی ہونے کے بجائے آر ایس ایس اپنی مرضی کے مطابق کرے گی۔ ملک میں ہندو۔ مسلم، ہندو۔ سکھ اور فارورڈ بیک ورڈ کے نام پر فسادات پھیلاکر ان کا استعمال کرے گی۔