خواتین ہاکی ورلڈ کپ: آسٹریلیا کے خلاف گول کے بغیر ڈرا،
بھارتی ٹیم کی سیمی فائنل کی امیدیں ختم
ایمسٹلوین، 24 اگست (ہ س)۔ بھارتی خواتین ہاکی ٹیم کی ایف آئی ایچ ہاکی ورلڈ کپ 2026 کے سیمی فائنل میں پہنچنے کی امیدیں اتوار کی دیر رات ختم ہوگئیں۔ فیصلہ کن پول-ای کے مقابلے میں بھارت کو آسٹریلیا کے خلاف گول کے بغیر ڈرا پر اکتفا کرنا پڑا۔ اس نتیجے کے ساتھ آسٹریلیا نے سیمی فائنل میں جگہ بنا لی، جبکہ بھارتی ٹیم اب پانچویں اور چھٹی پوزیشن کے لیے کھیلے گی۔بھارت کو آخری چار میں جگہ بنانے کے لیے ہر حال میں کامیابی حاصل کرنا ضروری تھی۔ اس سے قبل دن میں نیدرلینڈز نے چین کو شکست دی تھی، جس کے بعد آسٹریلیا کے لیے صرف ڈرا ہی سیمی فائنل میں پہنچنے کے لیے کافی تھا۔ آسٹریلیا نے زیادہ گول کرنے کی بنیاد پر آخری چار ٹیموں میں جگہ بنائی۔بھارت اور چین کے دو، دو پوائنٹس رہے، تاہم بہتر گول کے فرق کی وجہ سے بھارت پول میں تیسرے نمبر پر رہا۔ بھارت کا گول فرق منفی دو جبکہ چین کا منفی تین رہا۔ اس پول سے دفاعی چمپئن نیدرلینڈز اور آسٹریلیا نے سیمی فائنل کے لیے کوالیفائی کیا۔
آسٹریلیا نے آغاز سے ہی گیند پر قبضہ برقرار رکھتے ہوئے بھارتی ٹیم پر دباؤ بنائے رکھا۔ دوسرے منٹ میں آسٹریلیا نے گول کردیا تھا، لیکن بھارت نے فوری طور پر ویڈیو ریفرل لیا۔ ری پلے میں تصدیق ہوئی کہ گیند آسٹریلوی کھلاڑی کی اسٹک سے لگنے کے بعد بھارتی دفاعی کھلاڑی کے جسم سے ٹکرائی تھی، جس کے بعد گول مسترد کردیا گیا۔
بھارت کو ابتدائی مرحلے میں کچھ مواقع ملے، لیکن ٹیم انہیں گول میں تبدیل نہ کرسکی۔ دسویں منٹ میں گول کیپر سویتا پونیا نے ایمی لاٹن کی کوشش کو شاندار انداز میں روک کر بھارت کو گول سے بچایا۔دوسرے کوارٹر کے آغاز میں سویتا کی جگہ بیچو دیوی نے گول کیپنگ کی ذمہ داری سنبھالی۔ انہوں نے 19ویں منٹ میں گریس ینگ کی کوشش پر ڈائیو لگا کر شاندار بچاؤ کیا۔بھارت کو 30ویں منٹ میں پہلا پنالٹی کارنر ملا، لیکن آسٹریلوی دفاع نے اسے کامیاب نہیں ہونے دیا۔ پہلے ہاف کے اختتام تک دونوں ٹیمیں 0-0 سے برابر رہیں۔
بھارتی ٹیم نے دوسرے ہاف میں جارحانہ انداز اختیار کیا اور زیادہ کھلاڑیوں کو آگے بھیجا، لیکن فارورڈ کھلاڑیوں کے درمیان تال میل اور آخری پاس میں وہ تیزی نظر نہیں آئی جس کی ٹیم کو ضرورت تھی۔40ویں منٹ میں آسٹریلیا نے پنالٹی کارنر کے ذریعے گول کیا، لیکن ویڈیو ریفرل کے بعد اس گول کو بھی مسترد کردیا گیا۔ یہ میچ میں آسٹریلیا کا دوسرا مسترد ہونے والا گول تھا۔ بھارت نے بھی جوابی حملے کیے۔ 45ویں منٹ میں شلپی نے زوردار شاٹ لگایا، لیکن گیند گول کے سامنے سے گزر گئی۔
آخری کوارٹر میں بھارتی ٹیم نے گول کی تلاش مزید تیز کردی۔ آسٹریلیا کو کئی پنالٹی کارنر ملے، لیکن بھارتی دفاع اور بیچو دیوی نے شاندار بچاؤ کرتے ہوئے آسٹریلیا کو برتری حاصل کرنے سے روکے رکھا۔ 54ویں منٹ میں بیچو دیوی نے پاؤں سے شاندار بچاؤ کرتے ہوئے آسٹریلیا کا یقینی گول روک دیا۔
میچ میں پانچ منٹ سے زیادہ کا وقت باقی رہتے ہوئے بھارت نے گول کیپر کو میدان سے ہٹا کر ایک اضافی آؤٹ فیلڈ کھلاڑی اتارا، تاکہ فیصلہ کن گول کیا جاسکے۔ 59ویں منٹ میں آسٹریلیا کو پنالٹی کارنر ملا، لیکن سلیمہ ٹیٹے نے شاندار دفاع کرتے ہوئے بھارت کو گول کھانے سے بچا لیا۔آخرکار مقابلہ 0-0 سے برابر ختم ہوا اور اسی کے ساتھ بھارتی خواتین ٹیم کا سیمی فائنل میں پہنچنے کا خواب بھی ٹوٹ گیا۔ اب بھارتی ٹیم پانچویں اور چھٹی پوزیشن کے لیے کھیلے گی۔
