سابق وزیر سادھو سنگھ دھرم سوت گرفتار، گلجیاں کے خلاف مقدمہ درج

چنڈی گڑھ, جون ۔سادھو سنگھ دھرم سوت، جو پنجاب میں کیپٹن امریندر سنگھ کی قیادت والی کانگریس حکومت میں کابینہ کے وزیر تھے، کو آج علی الصبح پٹیالہ ویجیلنس بیورو کی ٹیم نے بدعنوانی کے ایک معاملے میں گرفتار کر لیا۔سرکاری ذرائع کے مطابق دھرم سوت کو فتح گڑھ صاحب ضلع کے املوہ گاؤں میں واقع ان کی رہائش گاہ سے صبح 3 بجے گرفتار کیا گیا۔ بتایا جاتا ہے کہ دھرم سوت کو ڈسٹرکٹ فاریسٹ آفیسر گرومن پریت سنگھ کی حالیہ گرفتاری کے انکشافات کے بعد گرفتار کیا گیا ہے۔بیورو نے ایک اور سابق وزیر سنگت سنگھ گلجیان کے خلاف بھی مقدمہ درج کیا ہے۔ مذکورہ دو وزراء کے علاوہ ان کرپشن کیسز میں مزید نو افراد کے نام ہیں۔ ان میں امیت چوہان (آئی ایف ایس)، گرومن پریت سنگھ (ڈی ایف او)، دلپریت سنگھ (فاریسٹ گارڈ) کے علاوہ چمکور سنگھ، کملجیت سنگھ، کلوندر سنگھ شیرگل اور سچن کمار شامل ہیں۔بتایا جاتا ہے کہ گرفتار ڈی ایف او اور ٹھیکیدار ہمی سے پوچھ گچھ کے دوران محکمہ جنگلات میں بے ضابطگیوں کا انکشاف ہوا۔ اس کے بعد ہی دھرم سوت کو گرفتار کیا گیا۔ دونوں اہلکار مبینہ طور پر وزیر کے ساتھ ملوث پائے گئے۔ ان پر 25,000 سے زائد درختوں کی غیر قانونی کٹائی میں ملوث ہونے کا الزام ہے۔ اس معاملے میں کھنہ سے تعلق رکھنے والے ایک پنجابی روزنامہ کے صحافی کو بھی گرفتار کیا گیا ہے۔سادھو سنگھ دھرم سوت، جو کیپٹن کی حکومت میں وزیر جنگلات تھے، ماضی میں بھی ان پر بدعنوانی کے الزامات لگ چکے ہیں۔ بیورو ذرائع کے مطابق محکمہ جنگلات کے کئی اعلیٰ افسران اور سابق افسران بھی اس کرپشن میں ملوث ہیں۔ پوچھ گچھ کے دوران کئی افسران کے نام سامنے آئے ہیں۔ جلد ہی انہیں بھی گرفتار کیا جا سکتا ہے۔