بھارتی باکسر میناکشی تھائی لینڈ اوپن سے باہر

نئی دہلی، اپریل۔ہندوستانی باکسر میناکشی اتوار کو فوکٹ میں خواتین کے 51 کلوگرام زمرے میں باکسر جوتاماس جیتپونگ سے پہلے راؤنڈ میں ہارنے کے بعد تھائی لینڈ اوپن سے باہر ہوگئیں۔ اس قریبی مقابلے میں میناکشی کو 3-2 سے شکست کا سامنا کرنا پڑا۔ میچ کے پہلے راؤنڈ میں دونوں باکسرز نے دور سے کھیلنا بہتر سمجھا لیکن دوسرے راؤنڈ میں دونوں نے ایک دوسرے پر کئی مکے برسائے۔ فائنل راؤنڈ میں دونوں باکسروں کے درمیان سخت مقابلہ دیکھنے میں آیا جہاں میناکشی نے چند مکے لگائے لیکن یہ انہیں فتح دلانے کے لیے کافی نہیں تھے۔ پیر کو ہونے والے مقابلے میں پانچ خواتین سمیت چھ ہندوستانی باکسر حصہ لیں گے۔ خواتین کے حصے میں مونیکا (48کلو گرام)، رینو (54کلو گرام)، 2019 ایشین چمپئن شپ کی کانسی کا تمغہ جیتنے والی منیشا (57کلو گرام)، مونیکا (63کلو گرام) اور بھاگیاوتی کچاری (75کلو گرام) رنگ میں اتریں گی۔ گزشتہ سیزن کے طلائی تمغہ جیتنے والے آشیش کمار 81 کلوگرام کے کوارٹر فائنل میں اپنی مہم کا آغاز مقامی باکسر افسیت خانکھوکرویا کے خلاف کریں گے۔ 2019 میں ٹورنامنٹ کے آخری سیزن میں، ہندوستانی دستے نے ایک گولڈ، چار چاندی اور تین کانسی سمیت آٹھ تمغے جیتے تھے۔