کپل شرما کی والدہ نے کامیڈین کے بچپن سے جڑا راز اکشے کمار کے سامنے بتادیا

ممبئی،فروری۔بھارتی کامیڈین کپل شرما کی والدہ نے اپنے بیٹے کے بچپن سے جڑا راز اکشے کمار کے سامنے بتادیا۔میڈیا رپورٹ کے مطابق کپل شرما شو میں اس بار اکشے کمار کے ساتھ سونم باجوہ، مونی رائے، دیشا پٹانی اور نورا فتحی بھی شریک ہوئیں۔یہ تمام ہی فنکار شمالی امریکا میں شوز کے لیے دورے کی تیاری کر رہے ہیں، کپل شرما کے اس شو کا پرومو بھی سامنے آ گیا ہے۔اکشے کمار جن کی حال ہی میں ’سیلفی‘ نامی فلم ریلیز ہوئی ہے، جس میں عمران ہاشمی، ڈیانا پینٹی اور نصرت بھروچا نے نمایاں کردار نبھایا ہے۔کپل شرما کے تازہ پرومو میں دیکھا جاسکتا ہے کہ وہ بھارتی کامیڈین کی والدہ کے ساتھ پنجابی میں بات کر رہے ہیں۔انہوں نے کپل کی والدہ سے اپنے بیٹے کے بچپن سے متعلق پوچھا کہ یہ کتنا شرارتی تھا؟ اس پر کامیڈین کی ماں نے جواب دیا کہ کپل بہت زیادہ شرارتی نہیں تھا۔اس پر اکشے کمار نے کہا کہ اگر شرارتی نہیں تھا تو دنیا میں پھر کوئی بھی شرارتی نہیں ہو سکتا۔اس پر کپل شرما کی والدہ نے بتایا کہ ہم پولیس کوارٹر میں رہتے تھے، یہ ہمارا چھوڑ کر باقی 5 کوارٹرز کے سامنے کاغذ کی پڑیا بنا کر رکھ آتا تھا، جس پر لوگ یہ سمجھتے تھے کہ پتا نہیں کون کالا جادو کر گیا، لیکن میں انہیں بتا نہیں سکتی یہ میرے بچے نے کیا ہے۔اس پر کپل شرما نے اپنی والدہ سے پوچھا کہ میرے والد صاحب آپ کو پہلی کونسی فلم دکھانے سنیما لے گئے تھے؟ اس پر جواب آیا’تلسی تیرے آنگن کی‘۔