کولکتہ پولیس سے اجازت نہ ملنے کے باوجود گنگا آرتی کی جائے گی: مجمدار

کولکتہ، جنوری۔بھارتیہ جنتا پارٹی (بی جے پی) نے کہا ہے کہ پارٹی کی طرف سے منگل کی شام گنگا کے مشرقی کنارے پر بابوگھاٹ میں منعقد ہونے والے ‘گنگا آرتی’ کے پروگرام کو کولکتہ پولیس کی طرف سے اجازت نہ ملنے کے باوجود ملتوی نہیں کیا جائے گا۔ بی جے پی کی مغربی بنگال یونٹ کے صدر سکانت مجمدار نے منگل کو کہا کہ شام 4 بجے سے شام 7 بجے کے درمیان گنگا آرتی کا پروگرام منعقد کیا جائے گا۔ خیال ر ہے کہ کولکتہ پولیس نے 09 جنوری کو بی جے پی کو لکھے ایک خط میں واضح طور پر کہا تھا کہ آئندہ گنگا ساگر میلے کے لیے یاتریوں کی بھیڑ کی وجہ سے اس طرح کی اجازت دینا ممکن نہیں ہے۔ شہر میں جی -20 اجلاس پہلے ہی شروع ہو چکا ہے۔پولیس نے کہا، "10 جنوری 2023 کو بھی بڑی تعداد میں تیرتھ یاتریوں کے جمع ہونے کی امید ہے۔ آپ کی تقریب سے بھاری ٹریفک جام اور تیرتھ یاتریوں کی نقل و حرکت میں مشکلات پیدا ہوں گی۔ اس کے علاوہ کولکتہ میں 09 سے 11 جنوری تک جی 20 سربراہی کانفرنس کا آغاز ہو چکا ہے۔ اس کے علاوہ پولیس اہلکاروں کی ایک بڑی تعداد معمول کی دیگر ڈیوٹیوں میں مصروف رہے گی۔جوائنٹ کمشنر آف پولیس (پولیس ہیڈکوارٹر) کی طرف سے جاری کردہ خط میں کہا گیا ہے، "اس صورتحال کے پیش نظر آپ سے درخواست کی جاتی ہے کہ آپ اپنا طے شدہ پروگرام ملتوی کریں اور گنگا ساگر میلہ، 2023 کی تکمیل کے بعد نئے سرے سے درخواست دیں۔”دریں اثنا، کولکتہ پولیس نے منگل کو بابوگھاٹ میں گنگا آرتی کے لیے بی جے پی کارکنوں کی جانب سے بنائے گئے پنڈال کو منہدم کردیا۔ اس کے باوجود بی جے پی کے ریاستی صدر نے دعویٰ کیا ہے کہ ان کا پروگرام شام 4 بجے سے شام 7 بجے کے درمیان ہوگا۔