پاکستان ٹی ٹوئنٹی ورلڈ کپ کے سیمی فائنل میں

ایڈیلیڈ، نومبر۔شاہین شاہ آفریدی (22/4) اور محمد حارث کے دھماکہ خیز 31 رنز کی مدد سے پاکستان نے ٹی ٹوئنٹی ورلڈ کپ 2022 کے سپر-12 میچ میں اتوار کو بنگلہ دیش کو چھ وکٹوں سے شکست دے کر ٹورنامنٹ کے سیمی فائنل میں جگہ بنالی۔ گروپ۔2 کے میچ میں بنگلہ دیش نے پاکستان کو 128 رنز کا ہدف دیا تھا جسے پاکستان نے 11 گیندیں باقی رہتے حاصل کر لیا۔یہ میچ بنیادی طور پر کوارٹر فائنل تھا کیونکہ دن کے افتتاحی میچ میں جنوبی افریقہ نیدرلینڈز سے ہار گیا تھا اور جیتنے والی ٹیم کو سیمی فائنل میں جانا تھا۔شاہین نے اس اہم میچ میں اپنی رفتار دوبارہ حاصل کی، صرف 22 رنز کے عوض چار وکٹیں لے کر بنگلہ دیش کو 127 رنز تک محدود کر دیا۔ہدف کے تعاقب میں حارث بیٹنگ کے لیے آئے تو پاکستان کو 52 گیندوں پر 67 رنز درکار تھے۔ حارث نے 18 گیندوں پر ایک چوکے اور دو چھکوں کی مدد سے 31 رنز بنا کر اپنی ٹیم کی سیمی فائنل تک رسائی کی راہ ہموار کی۔اس جیت کے ساتھ ہی پاکستان گروپ 2 میں ہندوستان کے بعد سیمی فائنل میں پہنچنے والی دوسری ٹیم بن گئی ہے۔بنگلہ دیش نے ٹاس جیت کر بیٹنگ کا فیصلہ کیا اور اننگز کو آسانی سے آگے بڑھایا، اس نے لٹن داس (10) کی وکٹ جلد ہی کھو دی۔ نجم الحسن شانتو اور سومیا سرکار نے دوسری وکٹ کے لیے 52 رنز بنائے۔ شانتو نے 48 گیندوں میں سات چوکوں کی مدد سے 54 رنز بنائے جبکہ سومیا سرکار نے 17 گیندوں میں 20 رنز بنائے۔ شانتو-سومیا اس شراکت سے بنگلہ دیش کو بڑے اسکور کی طرف لے جا رہے تھے لیکن شاداب نے 11ویں اوور میں سومیا اور کپتان شکیب الحسن کو آؤٹ کر کے میچ کا رخ ہی بدل دیا۔یہاں سے بنگلہ دیش کی وکٹیں گرنے کا سلسلہ شروع ہوا۔ اگرچہ عفیف حسین نے 20 گیندوں پر ناٹ آؤٹ 24 رنز بنائے لیکن دوسرے مڈل آرڈر بلے باز ڈبل فیگرز کو بھی نہ چھو سکے اور بنگلہ دیش 127/8 تک محدود رہا۔شاہین نے چار اوورز میں صرف 22 رنز دے کر چار وکٹیں حاصل کیں جبکہ شاداب نے چار اوورز میں 30 رنز دے کر دو وکٹیں حاصل کیں۔ حارث رؤف اور افتخار احمد نے ایک ایک وکٹ حاصل کی۔128 رنز کے ہدف کے تعاقب میں پاکستان کے اوپنرز نے 63 گیندیں کھیلنے کے بعد 57 رنز کی شراکت قائم کی۔ پاکستان کے اوپنرز کی اچھی پارٹنرشپ نے اسے میچ میں مضبوط پوزیشن میں پہنچادیا۔ بابر اعظم نے ٹورنامنٹ میں پہلی بار ڈبل فگر کا ہندسہ عبور کیا، انہوں نے 33 گیندوں پر 25 رنز بنائے جبکہ محمد رضوان نے 32 گیندوں پر 32 رنز بنائے۔اپنا دوسرا ٹی ٹوئنٹی میچ کھیل رہے حارث نے اس وقت اننگز کو سنبھالا جب ٹیم کے دونوں اوپنرز آؤٹ ہوئے۔ انھوں نے تیسری وکٹ کے لیے محمد نواز (04) کے ساتھ 31 رنز کی شراکت داری کی، جب کہ انھوں نے شان مسعود (24 ناٹ آؤٹ) کے ساتھ چوتھی وکٹ کے لیے 29 رنز جوڑے۔ شکیب الحسن نے 17ویں اوور میں حارث کو پویلین بھیجا جس کے بعد شان نے 19ویں اوور کی پہلی گیند پر فاتحانہ رن بنا کر پاکستان کو فتح کی دہلیز پر پہنچا دیا۔ اب جب کہ ہندوستان اور پاکستان گروپ-2 سے سیمی فائنل کے لیے کوالیفائی کر چکے ہیں، سیمی فائنل میں دونوں ٹیمیں کس ٹیم سے آمنے سامنے ہوں گی، اس کا تعین ہندوستان اور زمبابوے کے درمیان ہونے والے میچ کے نتائج سے ہوگا۔