ٹی ٹوئنٹی سیریز کے لیے یو اے ای افغانستان کی میزبانی کرے گا

دوبئی، جنوری ۔ متحدہ عرب امارات (یو اے ای) ابوظہبی میں 16 فروری سے شروع ہونے والی تین میچوں کی ٹی۔ٹوئنٹی سیریز میں افغانستان کی میزبانی کرے گا۔یہ سیریز دونوں کرکٹ بورڈز کے درمیان گزشتہ نومبر میں طے پانے والے معاہدے کے تحت منعقد کی جا رہی ہے۔ امارات کرکٹ بورڈ (ای سی بی) اگلے پانچ سالوں کے لیے افغانستان کرکٹ بورڈ (اے سی بی) کو میچز کی پیشکش کے ساتھ ساتھ انفراسٹرکچر بھی فراہم کرے گا۔ نتیجے کے طور پر یو اے ای معاہدے کی میعاد ختم ہونے تک سالانہ تین میچوں کی ٹی۔ٹوئنٹی سیریز کی میزبانی کر رہا ہے۔اے سی بی کے چیف ایگزیکٹو آفیسر (سی ای او) نصیب خان نے کہاکہ ہمیں اس شراکت داری کا حصہ بننے پر فخر ہے اور اے سی بی کے ساتھ ہماری بات چیت کے نتائج سے خوش ہیں۔ فروری میں ہونے والی ٹی۔ٹوئنٹی سیریز ہماری طویل مدتی وابستگی کا پہلا قدم ہے اور ہم ای سی بی کے ساتھ اپنے تعلقات کو جاری رکھنے کے منتظر ہیں۔ دونوں ٹیمیں مارچ 2018 کے بعد پہلی بار آمنے سامنے ہوں گی۔ افغانستان اس سال پہلی بار کوئی میچ کھیلے گا۔ اس کے بعد افغان ٹیم مارچ میں پاکستان کے خلاف تین میچوں کی ٹی ٹوئنٹی سیریز بھی کھیلے گی۔ سیریز کا انعقاد غیر جانبدار مقام پر کیا جا سکتا ہے جس سے حاصل ہونے والی رقم افغانستان اور پاکستان کے بورڈز کے درمیان شیئر کی جائے گی۔افغانستان کی موجودہ سیاسی صورتحال کے پیش نظر وہاں کرکٹ میچز کا انعقاد ممکن نہیں۔ اگست 2021 میں طالبان کے قبضے کے بعد صورتحال مزید خراب ہوگئی، جس کی وجہ سے اے سی بی کے بہت سے اہلکار ملک سے فرار ہوگئے۔ اس کے بعد افغانستان کے کھلاڑیوں کے لیے بیرون ملک کھیلنے کے لیے ویزا حاصل کرنا بھی ایک چیلنج بن گیا۔اس کے بعد اے سی بی نے تقریباً دو درجن کھلاڑیوں اور عملے کے لیے یو اے ای کے رہائشی ویزوں کا بندوبست کیا۔ طالبان کی جانب سے لڑکیوں کی یونیورسٹی میں تعلیم پر پابندی کے بعد آسٹریلیا نے مارچ میں افغانستان کے خلاف تین میچوں کی ون ڈے سیریز بھی منسوخ کر دی تھی۔متحدہ عرب امارات کے خلاف سیریز کے لیے افغانستان نے ابتدائی طور پر 22 کھلاڑیوں کا انتخاب کیا ہے جو تربیتی کیمپ میں حصہ لیں گے۔ راشد خان کی کپتانی میں ٹیم تربیتی کیمپ کے لیے اگلے ہفتے ابوظہبی روانہ ہوگی۔دریں اثنا، اے سی بی نے مردوں کی ٹیم کے ہیڈ کوچ جوناتھن ٹروٹ اور فیلڈنگ کوچ ریان مارون کو اس سال کے آخر میں ہونے والے ون ڈے ورلڈ کپ تک رہنے کو کہا ہے۔یو اے ای سیریز کے لیے افغانستان کا اسکواڈ: راشد خان (کپتان)، رحمان اللہ گرباز (وکٹ کیپر)، عبدالرحمان رحمانی، افسر زازئی، عظمت اللہ عمرزئی، بلال سمیع، فرید احمد ملک، فضل حق فاروقی، گلبدین نائب، حضرت اللہ زازئی، ابراہیم زدران، مجیب الرحمان، نجیب اللہ زدران، ننگیال خروٹی، نوین الحق، نجات مسعود، نور احمد، رحمت شاہ، صدیق اللہ اتل، شاہد اللہ کمال، شرف الدین اشرف اور ظہیر خان۔