ماریلن منرو کی زندگی پر بننے والی فلم کا ٹریلر جاری

لاس اینجلس،جون۔1950 کی دہائی میں ہالی ووڈ فلم انڈسٹری کی خوبصورت ترین اداکارہ ماریلن منرو کی زندگی پر بنائی جانے والی فلم کا ٹریلر جاری کر دیا گیا ہے۔فلم کے ہدایتکار اینڈریو ڈومینک ہیں جبکہ ماریلن منرو کا کردار اینا ڈی آرماس نے ادا کیا ہے۔آنجہانی اداکارہ پر بننے والی فلم Blonde اسی عنوان سے تحریر کردہ ناول پر مبنی ہے جسے جوائس کیرل اوٹس نے 2000ء میں تحریر کیا تھا۔دلچسپ بات یہ ہے کہ اس فلم کی شوٹنگ 2010 میں شروع ہونا تھی اور پہلے پہل ماریلن منرو کا کردار ادا کرنے کے لیے نیومی واٹس کا انتخاب کیا گیا تھا۔بعد ازاں جیسیکا چیسٹین کا نام بھی زیر غور تھا لیکن قرعہ فال اینا ڈی آرماس کے نام نکلا۔کیوبا سے تعلق رکھنے والی اینا ڈی آرماس نے بتایا کہ انہیں ماریلن منرو کے لہجے میں مہارت کے ساتھ مکالموں کی ادائیگی سیکھنے میں 9 مہینے لگے۔ماریلن منرو پر بننے والی یہ فلم 23 ستمبر کو نیٹ فلکس پر ریلیز کی جائے گی۔گزشتہ روز یوٹیوب پر جاری ہونے والے ٹریلر کو اب تک 28 لاکھ 38 ہزار سے زائد مرتبہ دیکھا جا چکا ہے۔