عرب لیگ سے شام کی برخاستگی کی اصل بنیاد اب بھی قائم ہے: قطری وزیر اعظم

دوحہ،اپریل۔قطر کے وزیر اعظم کا کہنا ہے کہ شام کی عرب لیگ میں واپسی کی بات قیاس آرائی ہے کیونکہ علاقائی تنظیم سے دمشق کے اخراج کی وجوہات ابھی بھی موجود ہیں۔قطر بشار الاسد حکومت کا کھلم کھلا ناقد رہا ہے جو کہ جمعہ کو سعودی عرب میں نو عرب ممالک کے درمیان ہونے والی بات چیت کا مرکزی موضوع ہو گی۔سفارت کاروں کا کہنا ہے کہ شام کی عرب لیگ میں واپسی اور مئی میں متوقع سربراہی اجلاس میں شرکت پر تبادلہ خیال کیا جائے گا۔تاہم، قطر کے وزیر اعظم شیخ محمد بن عبدالرحمن بن جاسم آل ثانی، جو جمعے کو ہونے والی بات چیت میں شامل ہوں گے، نے کہا کہ ایسا کچھ بھی تجویز نہیں کیا گیا ہے۔شیخ جاسم نے قومی ٹیلی ویڑن پر نشر ہونے والے انٹرویو میں کہا کہ یہ تمام قیاس آرائیاں ہیں کہ شام کی عرب لیگ میں واپسی ہوگی، اور یہ فیصلہ شامی عوام پر منحصر ہے۔انہوں نے مزید کہا کہ قطر کا موقف واضح ہے کہ شام کی رکنیت معطل کرنے کی وجوہات تھیں اور یہ وجوہات اب بھی موجود ہیں۔شام کو 2011 میں عرب لیگ سے خارج کر دیا گیا تھا جب صدر اسد نے ملک میں جمہوریت کے حامیوں کے خلاف وحشیانہ کریک ڈاؤن کیا تھا۔قطر نے اپوزیشن گروپوں کی حمایت کی اور وہ شامی پناہ گزینوں کو امداد دینے والا بڑا ملک ہے۔قطری وزیر اعظم نے کہا کہ اگرچہ جنگ بند ہو چکی ہے لیکن شام کے لوگ اب بھی بے گھر ہو رہے ہیں۔ہم شامی عوام پر حل مسلط نہیں کرنا چاہتے اور اس کا سیاسی حل ہونا چاہیے۔ہم سیاسی حل کے بغیر کوئی قدم نہیں اٹھاتے، اور ہر ملک کا اپنا فیصلہ اور خود مختاری ہے۔اس بارے میں بات چیت کے لیے خلیج تعاون کونسل کے چھ ممالک – بحرین، کویت، عمان، قطر، سعودی عرب اور متحدہ عرب امارات – کے علاوہ مصر، عراق اور اردن کے وزراء اور اعلیٰ حکام سعودی عرب کی درخواست پر جمعے کو جمع ہوں گے۔شام جنگ کے آغاز کے بعد سے سفارتی طور پر الگ تھلگ ہے جس میں لاکھوں افراد مارے جا چکے ہیں۔رپورٹس میں کہا گیا ہے کہ کچھ ممالک شام کی واپسی کی حمایت کرتے ہیں اور اس کے وزیر خارجہ فیصل مقداد بدھ کو جدہ پہنچے تھے، یہ جنگ شروع ہونے کے بعد اس طرح کا پہلا دورہ ہے۔