رائیڈو بڑودہ کی طرف سے کھیلتے نظر آئیں گے

ودودرہ، جولائی۔ امباتی رائیڈو آئندہ ڈومیسٹک سیزن میں بڑودہ کے لیے کھیلتے نظر آئیں گے۔ رائیڈو ایک پیشہ ور کرکٹر کے طور پر بڑودہ کی ٹیم سے وابستہ ہیں۔ آندھرا پردیش کی ٹیم نے بھی رائیڈو کو این او سی سرٹیفکیٹ دیا ہے۔ اگرچہ رائیڈو نے پچھلے کچھ سالوں میں صرف سفید گیند سے کرکٹ کھیلی ہے، لیکن وہ بڑودہ ٹیم کے لیے تمام فارمیٹس میں کھیلنے کے لیے دستیاب ہیں۔ اس سے پہلے بھی رائیڈو 2012 سے 2014 تک بڑودہ ٹیم کے لیے کھیل چکے ہیں۔ حالیہ برسوں میں رائیڈو حیدرآباد، آندھرا اور ودربھ کے لیے کھیل چکے ہیں۔ بڑودا کے بیٹنگ آرڈر کو رائیڈو کے آنے سے کافی تقویت ملے گی۔ بڑودہ ٹیم مینجمنٹ بھی دیپک ہڈا کو واپس لانے کی کوشش کر رہی ہے۔ دیپک نے سال 2020 میں بڑودہ ٹیم چھوڑ دی تھی۔ خیال کیا جاتا ہے کہ اس وقت کے کپتان کرونل پانڈیا اور دیپک کے درمیان سب کچھ ٹھیک نہیں چل رہا تھا۔ اس کے بعد دیپک نے بھی راجستھان ٹیم کی طرف سے کھیلتے ہوئے اچھی کارکردگی کا مظاہرہ کیا۔ حالانکہ دیپک اس سال فروری سے ہندوستانی ٹیم کے رکن ہیں اور انہیں مختلف سیریز میں مسلسل منتخب کیا جا رہا ہے۔ اس کے علاوہ دیپک کو لکھنؤ سپر جائنٹس کی ٹیم میں بھی منتخب کیا گیا جہاں وہ کرونل کے ساتھ کھیل رہے تھے۔ بڑودہ کرکٹ ایسوسی ایشن (بی سی اے) کے چیف ایگزیکٹیو ششیر ہٹنگڈی نے کہاکہ ’’جہاں تک میں جانتا ہوں، انہوں نے اپنے اختلافات کو دور کر لیا ہے۔ وہ ایک ہی آئی پی ایل ٹیم کے لیے ایک ساتھ کھیلے اور شاندار کارکردگی کا مظاہرہ کیا۔ ان کے درمیان جو بھی مسئلہ تھا، انہوں نے اسے حل کیا ہے۔تاہم، ہم ہڈا کی واپسی کے منتظر ہیں۔ ہم یقین سے نہیں کہہ سکتے کہ وہ ٹیم میں آئیں گے یا نہیں کیونکہ اسی وقت دیپک کو ٹیم کی ضرورت تھی، راجستھان نے انہیں اپنی ٹیم میں جگہ دی تھی۔ ہماری طرف سے ہم اسے ٹیم میں واپس لانے کی کوشش کر رہے ہیں۔