آئی ایس پی ایل سیزن-4 کے لیے بنگلورو اسٹرائیکرز تیار

ریتک روشن کو خطاب جیتنے کی امید

نئی دہلی، انڈین اسٹریٹ پریمیئر لیگ (آئی ایس پی ایل) کے چوتھے سیزن کے لیے بنگلورو اسٹرائیکرز تیار ہے۔ ٹیم کے مالک ریتک روشن نے اپنے کھلاڑیوں کو بہترین قرار دیتے ہوئے اعتماد ظاہر کیا ہے کہ اس بار بنگلورو اسٹرائیکرز کے پاس خطاب جیتنے کا مضبوط موقع ہے۔بنگلورو اسٹرائیکرز نے کھلاڑیوں کی نیلامی کے بعد 18 رکنی نئی ٹیم تیار کی ہے۔ ٹیم نے تمام شعبوں میں مضبوطی لانے پر توجہ دی ہے، جس میں یوگیش پینکر اور سمت ڈھیکالے جیسے اہم کھلاڑی شامل ہیں۔ اس کے علاوہ ٹیم میں گوریش ناگ ویکر، فیروز شیخ، زید خان، جگنیش پٹیل اور میور واگھمارے جیسے کھلاڑی بھی موجود ہیں۔
نئی ٹیم میں بلے بازی، گیند بازی اور آل راؤنڈ کارکردگی کے اچھے متبادل موجود ہیں۔ گزشتہ سیزن میں ٹاپ پانچ ٹیموں میں جگہ بنانے والی بنگلورو اسٹرائیکرز اس بار اپنی کارکردگی کو مزید بہتر بنانا چاہے گی۔ ٹیم کا ہدف خطاب کے لیے مضبوط دعویداری پیش کرنا ہوگا۔آئندہ سیزن کی تیاریوں اور ٹیم سےتوقعات کے بارے میں ریتک روشن نے اپنے ایک بیان میں کہا کہ ’’میں نئے سیزن اور اس ٹیم کے امکانات کو لے کر بے حد پرجوش ہوں۔ ہمارے ساتھ کچھ شاندار کھلاڑی جڑے ہیں اور مجھے لگتا ہے کہ ہمارے پاس ایک بہترین ٹیم ہے۔ بنگلورو اسٹرائیکرز سے وابستہ تمام لوگ کھیل کے آغاز کے لیے بے حد پُرجوش ہیں۔ مجھے پورا یقین ہے کہ اس بار ہمارے پاس خطاب جیتنے کا مضبوط موقع ہے۔‘‘ابھرتے ہوئے کھلاڑیوں کو پلیٹ فارم فراہم کرنے میں آئی ایس پی ایل کے کردار پر بات کرتے ہوئے اداکار نے کہا کہ ’’میرے لیے آئی ایس پی ایل کی سب سے اچھی بات یہ ہے کہ یہ ان کھلاڑیوں کو ایک پلیٹ فارم فراہم کرتی ہے، جنہیں شاید کہیں اور ایسا موقع نہ مل پاتا۔ ہمارے ملک میں بے پناہ صلاحیت موجود ہے اور مجھے لگتا ہے کہ آئی ایس پی ایل جیسی لیگ ان صلاحیتوں کو سامنے لانے میں مدد کر سکتی ہے۔ مجھے امید ہے کہ اس لیگ سے نکلنے والے کھلاڑی مستقبل میں بڑی کامیابیاں حاصل کریں گے اور ہندوستانی کرکٹ میں بڑے پیمانے پر اپنا تعاون دیں گے۔‘‘آئی ایس پی ایل کا چوتھا سیزن گوا میں منعقد ہو رہا ہے۔ لیگ کا مقصد گزشتہ سیزن سے ملنے والے جوش و خروش کو آگے بڑھانے کے ساتھ ابھرتے ہوئے کھلاڑیوں کو اپنی صلاحیتوں کے اظہار کا ایک اور بڑا موقع فراہم کرنا ہے۔

Related Articles