بہار کو بین الاقوامی بازاروں تک رسائی دلا کر برآمدات کا بڑا مرکز بنانا ہے: وزیر اعلیٰ سمراٹ چودھری
پٹنہ، ۔ بہار کو قومی اور بین الاقوامی بازاروں سے جوڑ کر برآمدات کا ایک بڑا مرکز بنانے کے مقصد سے ریاستی حکومت نے کوششیں تیز کردی
ہیں۔ اسی سلسلے میں جمعرات کے روزمحکمہصنعت کی جانب سے منعقدہ ریاستی سطح کی ورکشاپ ’لیوریجنگ ایف ٹی اے آؤٹ ریچ پروگرام‘ کا افتتاح وزیر اعلیٰ سمراٹ چودھری نے کیا۔ اس موقع پر انہوں نے کہا کہ بہار کی مصنوعات کو بین الاقوامی بازاروں تک پہنچانا اور ریاست کو برآمدات کا اہم مرکز بنانا حکومت کی ترجیحات میں شامل ہے۔ایک ہوٹل میں منعقدہ پروگرام سے خطاب کرتے ہوئے وزیر اعلیٰ نے کہا کہ بہار میں بجلی، سڑک، بنیادی ڈھانچے اور دیگر ضروری سہولیات کی فراہمی کے لیے مسلسل کام کیا گیا ہے۔ اب ریاست کو قومی اور بین الاقوامی بازاروں سے جوڑ کر صنعت، تجارت اور برآمدات کو نئی بلندیوں تک پہنچانا ہمارا مقصد ہے۔انہوں نے کہا کہ بہار کے سامنے آبادی اور پانی دو بڑے چیلنج رہے ہیں، لیکن آنے والے دس برسوں میں ان دونوں کو ریاست کی طاقت میں تبدیل کرنا ہوگا۔ اس کے لیے آبادی کو منظم کرنے اور آبی وسائل کا بہتر انتظام ضروری ہے۔
وزیر اعلیٰ نے کہا کہ رکسول سے ہلدیا تک گرین فیلڈ سڑک کی تعمیر سے بہار کے سات سے آٹھ اضلاع کو فائدہ پہنچے گا۔ اس کے علاوہ سون پور اور بھاگلپور کے آس پاس دو بڑے ہوائی اڈے تیار کرنے کا منصوبہ ہے، تاکہ ریاست کا رابطہ بین الاقوامی بازاروں سے مزید بہتر ہوسکے۔انہوں نے بتایا کہ والمیکی نگر، بیگوسرائے، رکسول، مظفرپور، سہرسہ، گوپال گنج، فاربس گنج اور کشن گنج سمیت مختلف مقامات پر ہوائی اڈوں کی ترقی کے لیے کام کیا جا رہا ہے۔ ان ہوائی اڈوں پر بین الاقوامی پروازوں کے مطابق رن وے اور دیگر سہولیات فراہم کرنے پر خصوصی توجہ دی جائے گی۔صنعتی شعبے کے مسائل کے حل کے لیے وزیر اعلیٰ نے تمام ضلع مجسٹریٹس اور پولیس سپرنٹنڈنٹس کو ہدایت دی کہ وہ ہر ماہ صنعت کاروں اور کاروباری نمائندوں کے ساتھ میٹنگ کریں اور ان کے مسائل کا فوری حل یقینی بنائیں۔وزیر اعلیٰ نے کہا کہ بہار کا مکھانا آج سپر فوڈ کے طور پر ملک اور دنیا میں مقبول ہو رہا ہے۔ بہار سے 40 ٹن مکھانا آسٹریلیا بھیجا گیا ہے، جبکہ ملک کی مجموعی مکھانہ پیداوار میں بہار کا حصہ تقریباً 80 فیصد ہے۔ مکھانا کے علاوہ لیچی اور مکئی کی پیداوار میں بھی بہار نمایاں مقام رکھتا ہے۔ مکئی کا استعمال ایتھنول کی تیاری میں بھی کیا جا رہا ہے۔انہوں نے کہا کہ ریاست کی ان خصوصی مصنوعات کو بین الاقوامی بازاروں میں مستحکم مقام دلانے کے لیے بہتر برانڈنگ، معیار، پیکجنگ اور برآمدات کا مضبوط نظام تیار کرنا ہوگا۔وزیر اعلیٰ کے مطابق بہار کی آبادی ملک کی مجموعی آبادی کا تقریباً 10 فیصد ہے اور ریاست قومی آمدنی میں بھی تقریباً 10 فیصد حصہ داری رکھتی ہے۔ ایسے میں قومی تجارت اور بازاروں میں بہار کی حصہ داری بڑھانے کی ضرورت ہے۔ اس کے لیے درآمدات و برآمدات کو فروغ دینے، نئے بازار تلاش کرنے اور آزاد تجارتی معاہدوں (ایف ٹی اے) سے فائدہ اٹھانے پر زور دیا گیا۔انہوں نے کہا کہ 31 ممالک میں موجود بہار چیپٹر کے تعاون سے ایسے بین الاقوامی بازاروں تک رسائی حاصل کرنے کی کوشش کی جانی چاہیے، جہاں ہندوستانی مصنوعات کے لیے بہتر مواقع اور کم درآمدی ڈیوٹی کی سہولت موجود ہے۔وزیر اعلیٰ نے کہا کہ بہار کی معیشت کو مضبوط بنانے اور نوجوانوں کے لیے روزگار کے زیادہ مواقع پیدا کرنے کا سب سے مؤثر راستہ صنعتی ترقی ہے۔ ریاست میں ڈرائی پورٹس کی تعداد بڑھانے کے لیے مرکزی وزیر تجارت و صنعت پیوش گوئل اور ریلوے وزیر اشونی ویشنو سے بھی درخواست کی گئی ہے۔انہوں نے بتایا کہ ریاست میں 12 سیٹلائٹ ٹاؤن شپ تیار کیے جا رہے ہیں۔ ان شہروں میں ریلوے رابطے اور ٹرانسپورٹ کی سہولیات بہتر بنانے پر خصوصی توجہ دی جا رہی ہے، تاکہ صنعتوں کو بہتر لاجسٹک سہولیات فراہم ہوسکیں۔وزیر اعلیٰ نے کہا کہ وزیر اعظم نریندر مودی سال 2047 تک ہندوستان کو ترقی یافتہ ملک بنانے کے ہدف کے ساتھ کام کر رہے ہیں اور اس مقصد کو حاصل کرنے کے لیے بہار کی خوشحالی اور ترقی بھی ضروری ہے۔اس موقع پر وزیر اعلیٰ سمراٹ چودھری نے ایف ٹی اے ایکشن پلان، ایکسپورٹر ہینڈ بک اور ایف اے کیو کتابچہ کا اجرا کیا۔ ان کی موجودگی میں بہار اسٹیٹ مارکیٹنگ اتھارٹی اور آئی آئی ایم بودھ گیا کے علاوہ گڈز کیپٹل اور ایم ایس ایم ای کے درمیان مفاہمت نامے (ایم او یو) پر دستخط بھی کیے گئے۔پروگرام سے صنعت وزیر شریسی سنگھ، ڈائریکٹر جنرل آف فارن ٹریڈ (ڈی جی ایف ٹی) لو اگروال اور صنعت محکمہ کے سکریٹری کندن کمار نے بھی خطاب کیا۔




