وزیر اعلیٰ ریکھا گپتا نے منک نہر پر صفائی کا تہوار منایا
جیکی شراف سمیت کئی معروف شخصیات نے صفائی مہم میں حصہ لیا
نئی دہلی، ۔ چھٹھ مہاپرو کے بعد دہلی میں صفائی کا پیغام عام کرنے کے مقصد سے دہلی حکومت نے جمعرات کو منک نہر پر صفائی مہم کا انعقاد کیا۔
وزیر اعلیٰ ریکھا گپتا کی قیادت میں منعقدہ اس مہم میں بالی ووڈ اداکار جیکی شراف، اداکارہ ایشا گپتا، گلوکار اسٹیبن بین، بسمل اور بڑی تعداد میں دہلی کے شہریوں نے شرکت کی۔ تمام افراد نے رضاکارانہ طور پر صفائی کے کام میں حصہ لے کر اپنی ذمہ داری نبھائی۔اس موقع پر وزیر اعلیٰ ریکھا گپتا نے کہا کہ چھٹھ مہاپرو کے بعد آج دہلی منک نہر پر صفائی کا تہوار منا رہی ہے۔ انہوں نے کہا کہ چھٹھ کے دوران گھاٹوں پر عقیدت نے سبھی کو ایک ساتھ جوڑا تھا اور آج انہی گھاٹوں کی صفائی کے لیے لوگ متحد ہوکر آگے آئے ہیں۔وزیر اعلیٰ نے مہم میں بچوں اور نوجوانوں کی شرکت کی خصوصی طور پر تعریف کرتے ہوئے کہا کہ ننھے بچوں اور نوجوان ساتھیوں نے اپنے جوش و جذبے سے سب سے زیادہ دل جیت لیے۔ بچوں نے صفائی کا عہد لیتے ہوئے، چہروں پر مسکراہٹ سجائے اور نکڑ ناٹکوں کے ذریعے صفائی کا خوبصورت پیغام دیا۔انہوں نے کہا کہ صفائی صرف ایک دن کی مہم نہیں ہے بلکہ اسے اپنی زندگی کا حصہ بنانا ضروری ہے۔ وزیر اعلیٰ نے صفائی مہم میں جوش و خروش کے ساتھ حصہ لینے والے تمام بچوں، نوجوانوں اور دہلی کے شہریوں کا شکریہ ادا کیا۔ انہوں نے لوگوں سے اپیل کی کہ وہ عوامی مقامات اور مذہبی مقامات کی صفائی برقرار رکھنے میں مسلسل اپنا تعاون دیتے رہیں۔




