جیکی شراف نے ’کالی کھیتی‘ میں چھوڑی اپنی چھاپ، حارث امتیاز خان نے کیا شاندار آغاز

ممبئی، ۔ ہارر فلموں میں عموماً خوفناک مناظر اور چونکا دینے والے موڑ دیکھنے کو ملتے ہیں، لیکن ’کالی کھیتی‘ اس صنف کو ایک منفرد انداز میں پیش کرتی ہے۔ فلم کی کہانی میں خوف کے ساتھ اسرار بھی شامل ہے، جو ناظرین کی دلچسپی برقرار رکھتا ہے۔’کالی کھیتی‘ کی خاص بات یہ ہے کہ کہانی آگے بڑھنے کے ساتھ کئی نئے سوالات پیدا کرتی ہے اور ان کے جوابات جاننے کے لیے ناظرین آخر تک فلم سے جڑے رہتے ہیں۔ ہدایت کار حارث امتیاز خان نے ہارر فلم کے لیے ایک منفرد موضوع کا انتخاب کیا ہے، جو اسے خاص بناتا ہے۔
فلم کی کہانی روہت (شرَد کیلکر)، اس کی بیوی رادھا (نیہا سرگم) اور بیٹے راجو (سپندن) کے گرد گھومتی ہے۔ روہت اپنے والد کشن (جیکی شراف) کو گاوں بلاتا ہے۔ گاوں پہنچنے کے بعد کشن کو کچھ ایسی غیر معمولی باتیں نظر آنے لگتی ہیں، جو اسے پریشان کرتی ہیں۔دوسری جانب روہت بار بار نئی کھیتی کی بات کرتا ہے۔ آخر اس کھیتی کے پیچھے کیا راز ہے اور اس کا خاندان سے کیا تعلق ہے، یہی فلم کی کہانی کا اصل تجسس ہے۔
دیہی ماحول میں بنی یہ کہانی آہستہ آہستہ سسپنس پیدا کرتی ہے۔ کئی مرتبہ ایسا محسوس ہوتا ہے کہ اب راز کھل جائے گا، لیکن فلم نئے موڑ کے ساتھ ناظرین کی دلچسپی برقرار رکھتی ہے۔ فلم کے اہم موڑ کے بارے میں زیادہ کچھ بتانا کہانی کا مزہ خراب کر سکتا ہے۔ فلم کا سب سے مضبوط پہلو اس کا منفرد ہارر تصور ہے۔
جیکی شراف فلم کی سب سے بڑی طاقت ہیں۔ ان کے کردار میں جذبات کے کئی رنگ دیکھنے کو ملتے ہیں اور وہ ہر صورتحال میں اپنی فطری اداکاری سے متاثر کرتے ہیں۔ ان کا حساس اور کمزور دکھائی دینے والا انداز کردار کو مزید دلچسپ بناتا ہے۔شرَد کیلکر بھی اپنی اداکاری سے کہانی کو مضبوطی فراہم کرتے ہیں۔ وہ غیر ضروری ڈرامائی انداز اختیار کیے بغیر اپنے کردار کی سنجیدگی کو پردے پر بخوبی پیش کرتے ہیں۔نیہا سرگم نے رادھا کے کردار میں اچھی اداکاری کی ہے۔ شاجی چودھری اور وریندر سکسینہ بھی اپنے کرداروں میں موثر نظر آتے ہیں، جبکہ سپندن نے بھی فطری اداکاری کی ہے۔ تمام فنکار فلم کے ماحول کو حقیقت سے قریب تر بنانے میں اپنا کردار ادا کرتے ہیں۔محض 25 سال کی عمر میں حارث امتیاز خان نے اپنی پہلی فلم کے ذریعے اپنی صلاحیتوں کا تعارف کرایا ہے۔ ہدایت کاری کے ساتھ انہوں نے فلم کی کہانی اور مکالمے بھی لکھے ہیں۔اتنی کم عمر میں ایک منفرد موضوع کا انتخاب کرنا اور اسے پردے پر موثر انداز میں پیش کرنا قابل تعریف ہے۔ ان کا اعتماد پوری فلم میں واضح طور پر نظر آتا ہے۔ وہ ہارر کو صرف خوفناک مناظر تک محدود نہیں رکھتے بلکہ کہانی کے ماحول اور اسرار کے ذریعے خوف پیدا کرتے ہیں۔ ان کی یہ پہلی فلم مستقبل کے لیے امید پیدا کرتی ہے۔
فلم کی سنیماٹوگرافی اس کی نمایاں خوبیوں میں سے ایک ہے۔ گاوں کے مناظر کہانی کے پراسرار ماحول کو بہتر انداز میں پیش کرتے ہیں۔ بیک گراونڈ میوزک اور ساو¿نڈ ڈیزائن کئی مناظر میں خوف کے اثر کو بڑھاتے ہیں۔ بجٹ کے لحاظ سے وی ایف ایکس کا کام بھی اچھا ہے۔تاہم ایڈیٹنگ میں کچھ بہتری کی گنجائش موجود ہے۔ فلم کے کچھ حصے طویل محسوس ہوتے ہیں، جس سے کہانی کی رفتار متاثر ہوتی ہے۔ اگر ایڈیٹنگ کو مزید بہتر اور مختصر رکھا جاتا تو فلم کا اثر مزید بڑھ سکتا تھا۔

Related Articles