ڈاکٹروں کے لیے 31 اکتوبر تک کیو آر کوڈ پلیٹ لگانا لازمی

امراوتی، ریاست میں طبی شعبے میں شفافیت بڑھانے اور جعلی ڈاکٹروں پر قابو پانے کے لیے مہاراشٹر میڈیکل کونسل نے ریاست کے تمام رجسٹرڈ ڈاکٹروں کے لیے نو یور ڈاکٹر یعنی کے وائی ڈی کیو آر کوڈ پلیٹ لازمی قرار دی ہے۔ تمام ڈاکٹروں کو اپنے کلینک، اسپتال یا پریکٹس سینٹر میں یہ پلیٹ 31 اکتوبر 2026 تک لگانا ضروری ہوگا۔مہاراشٹر میڈیکل کونسل کے سرکاری نظام سے حاصل شدہ اصل اور ڈیجیٹل دستخط شدہ پلیٹ ہی قابل قبول ہوگی۔ کیو آر کوڈ کا اسکرین شاٹ یا عام پرنٹ آؤٹ قابل قبول نہیں ہوگا۔ مریض یا ان کے رشتہ دار پلیٹ پر موجود کیو آر کوڈ اسکین کرنے کے بعد متعلقہ ڈاکٹر کا نام، تعلیمی قابلیت، ایم ایم سی رجسٹریشن نمبر، رجسٹریشن کی مدت اور پریکٹس سے متعلق سرکاری معلومات حاصل کرسکیں گے۔ اس سے مریضوں کے لیے ڈاکٹر کی رجسٹریشن اور قانونی حیثیت کی جانچ کرنا آسان ہوجائے گا۔مقررہ مدت تک کیو آر کوڈ پلیٹ نہ لگانے والے ڈاکٹروں کے خلاف مہاراشٹر میڈیکل کونسل کی جانب سے جرمانے اور تادیبی کارروائی کی جاسکتی ہے۔ ابتدائی مرحلے میں 15000 روپے تک جرمانے کی گنجائش رکھی گئی ہے۔ ریاست کے مختلف علاقوں میں شہری اور دیہی سطح پر جعلی ڈاکٹروں کی جانب سے طبی پریکٹس کیے جانے کی شکایات سامنے آتی رہی ہیں۔ ایسے میں اس فیصلے سے غیر قانونی طبی پریکٹس پر قابو پانے میں مدد ملنے کی توقع ہے۔تمام رجسٹرڈ ڈاکٹروں کو ایم ایم سی کے پورٹل کے ذریعے اپنی نو یور ڈاکٹر کیو آر کوڈ پلیٹ تیار کرکے اسے اپنے کلینک یا اسپتال کے نمایاں مقام پر لگانا ہوگا۔ اس پلیٹ کے ذریعے مریضوں کو ڈاکٹر سے متعلق ضروری سرکاری معلومات براہ راست دستیاب ہوسکیں گی۔ریاست میں کئی مقامات پر جعلی یا غیر اہل افراد کی جانب سے طبی پریکٹس کیے جانے کے معاملات سامنے آئے ہیں۔ کے وائی ڈی پلیٹ لازمی ہونے کے بعد صرف ایم ایم سی میں رجسٹرڈ اور اہل ڈاکٹر ہی یہ پلیٹ حاصل کرکے استعمال کرسکیں گے۔ اس اقدام سے جعلی ڈاکٹروں کی سرگرمیوں پر روک لگانے اور مریضوں کو مستند ڈاکٹر کی شناخت میں مدد ملنے کی توقع ہے۔