ایشیائی کھیل 2026 : تیجندرپال سنگھ تور نے چاندی کا تمغہ جیتا

آئیچی-ناگویا، ہندوستان کے اسٹار گولا پھینک کھلاڑی تیجندرپال سنگھ تور کا ایشیائی کھیلوں میں مسلسل تیسرا سونے کا تمغہ جیتنے کا خواب ہفتہ کو پورا نہیں ہوسکا۔ انہوں نے مردوں کے گولا پھینک مقابلے میں 20.64 میٹر کی بہترین کوشش کے ساتھ چاندی کا تمغہ جیتا۔دو بار کے دفاعی چیمپئن تور نے پہلی کوشش میں 20.06 میٹر کا فاصلہ طے کیا، جبکہ دوسری کوشش میں وہ 20.26 میٹر تک پہنچے۔ اس کے بعد انہوں نے اپنی کارکردگی میں بہتری لاتے ہوئے 20.64 میٹر کی بہترین کوشش کی اور چاندی کا تمغہ یقینی بنایا۔ایران کے محمد رضا طیبی نے 20.81 میٹر کے نئے ایشیائی کھیل ریکارڈ کے ساتھ سونے کا تمغہ جیتا۔ انہوں نے تور کے سابق ایشیائی کھیل ریکارڈ کو توڑ دیا، جو 20.75 میٹر تھا۔ تور نے یہ ریکارڈ 2018 کے جکارتہ ایشیائی کھیلوں میں سونے کا تمغہ جیتنے کے دوران قائم کیا تھا۔
سعودی عرب کے محمد طلوع نے 20.8 میٹر کی کوشش کے ساتھ کانسے کا تمغہ جیتا۔ ہندوستان کے دوسرے کھلاڑی کرن ویر سنگھ 18.40 میٹر کی کوشش کے ساتھ 10ویں مقام پر رہے۔
تور کا ایشیائی کھیلوں میں یہ مسلسل تیسرا تمغہ ہے۔ انہوں نے 2018 جکارتہ اور 2022 ہانگزو میں سونے کے تمغے جیتے تھے۔ ہانگزو میں انہوں نے 20.36 میٹر کی کوشش کے ساتھ اپنا خطاب برقرار رکھا تھا۔
تور کے نام مردوں کے گولا پھینک میں 21.77 میٹر کا ہندوستان ا قومی ریکارڈ بھی ہے، جو انہوں نے جون 2023 میں بھونیشور میں قائم کیا تھا۔ وہ ٹوکیو 2020 اور پیرس 2024 اولمپکس میں بھی ہندوستان کی نمائندگی کرچکے ہیں۔ 2026 ایشیائی انڈور ایتھلیٹکس چیمپئن شپ میں انہوں نے چاندی کا تمغہ جیتا تھا۔پنجاب کے موگا ضلع کے کھوسا پانڈو گاو¿ں سے تعلق رکھنے والے تور نے ابتدا میں کرکٹ کھیلی، لیکن والد کے مشورے پر گولا پھینکنے کے کھیل کو اپنایا۔ سخت محنت کے بعد وہ بھارت کے نمایاں ایتھلیٹس میں شامل ہوگئے۔ ان کے نام 2018 اور 2022 ایشیائی کھیلوں کے علاوہ 2019 اور 2023 ایشیائی ایتھلیٹکس چیمپئن شپ کے سونے کے تمغے بھی ہیں۔