طلبہ علم کو عاجزی، مہارت کو قوم کی خدمت اور کامیابی کو اقدار سے جوڑیں: ونود تاوڑے

بھاگلپور، بھارتیہ جنتا پارٹی (بی جے پی) کے قومی جنرل سکریٹری اور راجیہ سبھا ممبر پارلیمنٹ ونود تاوڑے نے طلبہ سے کہا کہ علم میں عاجزی، مہارت میں قوم کی خدمت اور کامیابی میں اعلیٰ اقدار کی شمولیت ہی تعلیم کو با معنی بناتی ہے۔
بی جے پی ایم پی نے کہا کہ تعلیم کی افادیت صرف علم حاصل کرنے میں نہیں ہے، بلکہ اسے معاشرے اور قوم کے مفاد میں استعمال کرنے میں ہے۔
مسٹر تاوڑے نے آج انڈین انسٹی ٹیوٹ آف انفارمیشن ٹیکنالوجی (آئی آئی آئی ٹی)، بھاگلپور کی کانووکیشن تقریب سے خطاب کرتے ہوئے کہا کہ طلبہ کو ملنے والی ڈگری ان کے تعلیمی سفر کا اختتام نہیں، بلکہ ایک نئے فکری اور پیشہ ورانہ سفر کا آغاز ہے۔ انہوں نے طلبہ پر زور دیا کہ وہ اپنے علم اور مہارت کا استعمال معاشرے اور قوم کی تعمیر میں کریں۔
بی جے پی کے قومی جنرل سکریٹری نے کہا کہ تعلیم اپنے اندر لامحدود امکانات لے کر چلتی ہے۔ جب کوئی طالب علم کسی ادارے میں داخلہ لیتا ہے تو اس کے ساتھ اس کے تجسس، خواب اور امکانات بھی آتے ہیں۔ سالہا سال کی تعلیم، تجربے، رہنمائی اور مسلسل سیکھنے کے بعد یہی امکانات ایک شکل اختیار کرتے ہیں اور کانووکیشن تقریب اسی ترقیاتی سفر کا ایک اہم پڑاؤ ہے۔
بی جے پی لیڈر نے کہا کہ بھاگلپور کی سرزمین کا علم کی بھرپور روایت سے گہرا تعلق رہا ہے۔ صدیوں پہلے اسی خطے میں وکرم شلا علم کی تخلیق، مطالعے اور اشاعت کا ایک بڑا مرکز تھا۔ آج آئی آئی آئی ٹی، بھاگلپور اطلاعات و ٹیکنالوجی کے نئے دور کے امکانات کو شکل دے کر علم کی اسی روایت کو جدید ٹیکنالوجی کے ساتھ آگے بڑھا رہا ہے۔