رام مندر چڑھاوا معاملے میں ایس آئی ٹی دو دن کے اندر چارج شیٹ داخل کرے گی

نئی دہلی،  ایودھیا کے شری رام جنم بھومی مندر میں چڑھاوے کی مبینہ چوری کی تحقیقات کر رہی خصوصی تحقیقاتی ٹیم (ایس آئی ٹی) دو دن کے اندر ٹرائل کورٹ میں چارج شیٹ داخل کرے گی۔ اتر پردیش ایس آئی ٹی کی جانب سے پیش ہوئے سالیسٹر جنرل تشار مہتا نے پیر کو سپریم کورٹ میں سماعت کے دوران چیف جسٹس سوریہ کانت کی سربراہی والی بنچ کو یہ اطلاع دی۔سماعت کے دوران مہتا نے کہا کہ تحقیقات کے لیے مقررہ 90 دن کی مدت 25 ستمبر کو مکمل ہو رہی ہے۔ اس لیے اگر 25 ستمبر تک چارج شیٹ داخل نہیں کی گئی تو معاملے کے ملزمان کو قانونی طور پر ’ڈیفالٹ ضمانت‘ مل سکتی ہے۔ ایسی صورت میں 25 ستمبر کی مقررہ مدت میں توسیع نہیں کی جا سکتی۔ آج کی سماعت کے دوران ایس آئی ٹی نے تحقیقات سے متعلق تازہ اسٹیٹس رپورٹ بھی سپریم کورٹ میں داخل کی۔
اس سے قبل 17 اگست کو عدالت نے ایس آئی ٹی کو تحقیقات میں تیزی لانے کی ہدایت دی تھی۔ عدالت نے ایس آئی ٹی کو چندے کی مبینہ چوری کے معاملے میں اب تک کی تحقیقات کی پیش رفت سے متعلق اسٹیٹس رپورٹ سیل بند لفافے میں داخل کرنے کی ہدایت بھی دی تھی۔اتر پردیش حکومت نے 27 جولائی کو سپریم کورٹ کو بتایا تھا کہ چندے کی مبینہ چوری کی تحقیقات کے لیے نئی ایس آئی ٹی تشکیل دی گئی ہے۔ اس کے بعد سپریم کورٹ نے ایک فارنسک آڈیٹر کو تحقیقات میں شامل کرنے کی ہدایت دی تھی۔ سماعت کے دوران مہتا نے بتایا کہ اتر پردیش حکومت نے لکھنؤ کے آئی ٹی ایس کرن کی سربراہی میں ایس آئی ٹی تشکیل دی ہے۔ عدالت نے 13 جولائی کو ٹرسٹ اور اتر پردیش حکومت کو نوٹس جاری کیا تھا اور ایس آئی ٹی کی تشکیل سے متعلق ریکارڈ بھی طلب کیا تھا۔یہ عرضی دو وکلاءاجے کمار رائے اور دنیش کمار یادو نے دائر کی ہے۔ عرضی میں مرکزی حکومت، اتر پردیش حکومت اور شری رام جنم بھومی تیرتھ کشیتر ٹرسٹ کو مالی بے ضابطگیوں کی روک تھام کے لیے ایک مؤثر نظام قائم کرنے کی ہدایت دینے کی درخواست کی گئی ہے، کیونکہ اس معاملے سے کروڑوں عقیدت مندوں کے جذبات وابستہ ہیں۔اس سے قبل ایک وکیل انوپ اوستھی نے بھی سپریم کورٹ کو خط لکھ کر کہا تھا کہ یہ معاملہ ملک کے کروڑوں لوگوںکے عقیدے سے جڑا ہوا ہے۔ خط میں اس معاملے کی عدالت کی نگرانی میں تحقیقات کرانے کا مطالبہ کیا گیا تھا۔ خط میں کہا گیا تھا کہ یہ مندر 2020 میں سپریم کورٹ کے فیصلے کے بعد تشکیل دیے گئے ٹرسٹ کے زیر انتظام ہے۔ مندر میں پران پرتشٹھا کی تقریب 22 جنوری 2024 کو ہوئی تھی۔ اس کے بعد سے بڑی تعداد میں عقیدت مند روزانہ مندر کے درشن کے لیے پہنچتے ہیں اور مندر کے چندہ بکس میں عطیات دیتے ہیں۔