ایل مورگن مدھیہ پردیش سے راجیہ سبھا ضمنی انتخاب میں بلا مقابلہ منتخب

بھوپال، ستمبر۔ مرکزی وزیر مملکت برائے اطلاعات و نشریات ایل مورگن کو آج مدھیہ پردیش سے راجیہ سبھا کی نشست پر ہونے والے ضمنی انتخاب میں بھارتیہ جنتا پارٹی (بی جے پی) کے ٹکٹ پر بلا مقابلہ منتخب قرار دیا گیا۔ضمنی انتخاب کے لیے امیدوار کی جانب سے کاغذات نامزدگی واپس لینے کا وقت 3 بجے تک مقرر کیا گیا تھا۔مسٹر مورگن اس ضمنی انتخاب کے لیے اکیلے امیدوار تھے اور نامزدگی واپس لینے کے مقررہ وقت کے بعد انہیں بلامقابلہ منتخب قرار دیا گیا۔مسٹر مورگن کو ریٹرننگ آفیسر اور قانون ساز اسمبلی کے پرنسپل سکریٹری اے پی سنگھ نے راجیہ سبھا ضمنی انتخاب کے لیے یہاں اسمبلی کے احاطے میں منتخب قرار دیا۔ مسٹر مورگن خود انتخابی سرٹیفکیٹ حاصل کرنے کے لیے ودھان اسمبلی پہنچے۔مسٹر مورگن نے 21 ستمبر کو اپنے کاغذات نامزدگی داخل کیے تھے۔ کاغذات نامزدگی داخل کرنے کی آخری تاریخ 22 ستمبر تھی اور کاغذات نامزدگی کی جانچ اگلے دن کی گئی۔ اصل میں تمل ناڈو سے تعلق رکھنے والے مسٹر مورگن راشٹریہ سویم سیوک سنگھ سے وابستہ رہے ہیں اور انہیں حال ہی میں مرکزی کابینہ میں شامل کیا گیا ہے۔ بی جے پی کی مرکزی قیادت نے مدھیہ پردیش سے راجیہ سبھا بھیجنے کا فیصلہ کیا ہے۔بی جے پی کے سینئر لیڈر تھاور چند گہلوت نے 07 جولائی کو راجیہ سبھا کی رکنیت سے استعفیٰ دے دیا تھا اور اس کی وجہ سے ایک نشست خالی تھی۔ مسٹر گہلوت کو کرناٹک کا گورنر بنایا گیا ہے۔مسٹر گہلوت کی میعاد 2 اپریل 2024 تک تھا۔ لہذا، اس نشست پر جیتنے والے امیدوار مسٹر مورگن کی مدت جو ان کے استعفیٰ کی وجہ سے خالی ہوئی تھی 2 اپریل 2024 تک جاری رہے گی۔ مدھیہ پردیش میں کل 11 راجیہ سبھا سیٹیں ہیں جن میں سے 08 بی جے پی اور 03 کانگریس کے پاس ہے۔