ہم نے ہماچل کی طاقت کی بنیاد رکھی ہے: کانگریس

نئی دہلی، اپریل ۔کانگریس نے ہماچل پردیش کے یوم تاسیس پر جمعہ کو اپنے کام کی تعریف کرتے ہوئے کہا کہ اس کی کوششوں سے ہی ہماچل پردیش کا قیام عمل میں آیا اور اسی نے ہماچل کو ترقی کی راہ پر لانے کا کام کیا۔کانگریس کے سابق صدر راہل گاندھی نے یوم ریاست کی مبارکباد دیتے ہوئے کہا کہ ہماچل پردیش قدرتی حسن اور مذہبی روایات کی علامت ہے۔ امید ہے کہ آنے والے وقت میں ہماچل پردیش ترقی کی نئی بلندیوں کو چھو لے گا۔ ریاست کے یوم تاسیس پر ہماچل پردیش کے تمام لوگوں کو میری نیک خواہشات۔ہماچل پردیش کے لوگوں کو یاد دلاتے ہوئے کانگریس نے اپنے آفیشل پیج پر ٹویٹ کیاکہ یہ کانگریس حکومت کی پالیسیوں کا نتیجہ ہے کہ ہماچل پردیش 2015 تک فی کس آمدنی میں ملک میں دوسرے نمبر پر رہا۔ تعلیم یافتہ ہماچل پردیش کی طرف قدم اٹھاتے ہوئے کانگریس نے ہماچل پردیش سنٹرل یونیورسٹی، نیشنل انسٹی ٹیوٹ آف ٹیکنالوجی، انڈین انسٹی ٹیوٹ آف ٹیکنالوجی قائم کی۔پارٹی نے کہا کہ سابق وزیر اعظم اندرا گاندھی کی قیادت میں ہماچل پردیش کو 25 جنوری 1971 کو مکمل ریاست کا درجہ دیا گیا تھا اور کانگریس نے ایشیا کا دوسرا سب سے بڑا بھاکڑا ڈیم بنا کر ہماچل کی ترقی کی راہ ہموار کی تھی۔ ریاست کی تشکیل کے 10 سال کے اندر، کانگریس نے ہماچل پردیش میں صد فیصدگھرانوں کو بجلی فراہم کرنے کا کام کیا۔