کاکروچ جنتا پارٹی نام بدل کر ”استعفیٰ جنتا پارٹی“ رکھ لے: اٹھاولے

جے پور، مرکزی وزیر مملکت برائے سماجی انصاف و تفویض اختیارات اور ریپبلکن پارٹی آف انڈیا کے قومی صدر رام داس اٹھاولے نے ہفتہ کو پنک سٹی پریس کلب میں میڈیا سے گفتگو کرتے ہوئے ایس آئی آر کے معاملے پر چیف الیکشن کمشنر گیانیش کمار کے استعفے کے مطالبے کو لے کر ”کاکروچ جنتا پارٹی“ پر طنز کیا۔ انہوں نے کہا کہ پارٹی کو اپنا نام بدل کر ”استعفیٰ جنتا پارٹی“ رکھ لینا چاہیے۔ سی جے پی نے گیانیش کمار کے استعفے کے لیے 48 گھنٹے کی مہلت دی ہے۔اٹھاولے نے کہا کہ سی جے پی نیٹ پیپر لیک کے خلاف تحریک کے دوران سرخیوں میں آئی تھی، لیکن ہر معاملے میں استعفے کا مطالبہ کرنا مناسب نہیں ہے۔ انہوں نے الیکشن کمیشن اور ایس آئی آر کا دفاع کرتے ہوئے کہا کہ کمیشن آزادانہ اور غیر جانب دارانہ طریقے سے کام کر رہا ہے۔
انہوں نے کہا کہ ایس آئی آر کا مقصد ووٹر لسٹ میں موجود نااہل ناموں کو ہٹانا اور اہل افراد کے نام شامل کرنا ہے۔ چیف الیکشن کمشنر پر لگائے گئے الزامات کی حکومت جانچ کرائے گی۔اٹھاولے نے راہل گاندھی پر الزام لگاتے ہوئے کہا کہ کانگریس کی جیت پر ای وی ایم پر سوال نہیں اٹھائے جاتے، جبکہ این ڈی اے کی جیت پر ای وی ایم کو ذمہ دار ٹھہرایا جاتا ہے۔ اٹھاولے نے دعویٰ کیا کہ وزیر اعظم نریندر مودی 15 سال تک وزیر اعظم رہیں گے اور سال 2029 میں بھی این ڈی اے ہی کی حکومت بنے گی۔