ٹینا امبانی کی عرضی پر ای ڈی، ایس ایف آئی او اور امیگریشن بیورو کو ہائی کورٹ کا نوٹس

نئی دہلی، دہلی ہائی کورٹ نے سابق اداکارہ اور ریلائنس گروپ کے چیئرمین انل امبانی کی اہلیہ ٹینا امبانی کی عرضی پر انفورسمنٹ ڈائریکٹوریٹ (ای ڈی)، سنگین دھوکہ دہی کی تحقیقات کے دفتر (ایس ایف آئی او) اور امیگریشن بیورو کو نوٹس جاری کیا ہے۔ ٹینا امبانی نے اپنی آئندہ بیرون ملک سفر کی منصوبہ بندی کے پیش نظر عدالت سے رجوع کرکے یہ جاننے کی درخواست کی ہے کہ آیا ان کے خلاف کوئی لک آو¿ٹ سرکلر (ایل او سی) جاری کیا گیا ہے یا نہیں۔ جسٹس منی پشکرنا کی بنچ نے معاملے کی اگلی سماعت 4 دسمبر کو مقرر کی ہے۔ٹینا امبانی نے 10 دسمبر سے تھائی لینڈ، متحدہ عرب امارات، عمان اور بھوٹان جانے کا منصوبہ بنایا ہے، جہاں وہ اپنے اہل خانہ اور دوستوں سے ملاقات کریں گی۔ سماعت کے دوران ٹینا امبانی کے وکیل ارشدیپ سنگھ کھورانہ نے کہا کہ اگرچہ ای ڈی اور ایس ایف آئی او نے انہیں پہلے طلب کیا تھا، لیکن فی الحال ان کے خلاف کوئی سمن زیر التوا نہیں ہے۔ انہوں نے مطالبہ کیا کہ اگر کوئی لک آوٹ سرکلر موجود ہے تو اس کی جانکاری دی جائے اور اگر نہیں ہے تو اسے عدالت کے ریکارڈ پر لایا جائے۔سماعت کے دوران ای ڈی کی جانب سے پیش ہوئے سینئر وکیل زوہیب حسین نے عرضی کی مخالفت کرتے ہوئے کہا کہ ٹینا امبانی تحقیقاتی ایجنسی کی جانب سے جاری کیے گئے دو سابقہ سمن پر پیش نہیں ہوئی تھیں۔ اس پر ٹینا امبانی کے وکیل نے عدالت کو بتایا کہ ریڑھ کی ہڈی میں فریکچر سے صحت یاب ہونے کے باعث وہ پہلے پیش نہیں ہوسکی تھیں۔ بعد ازاں انہوں نے متعلقہ حکام کو خط لکھ کر تحقیقات میں تعاون کرنے کی خواہش بھی ظاہر کی تھی۔ای ڈی اور ایس ایف آئی او، ریلائنس انل امبانی گروپ سے وابستہ کمپنیوں میں مبینہ مالی بے ضابطگیوں اور قرض کی ادائیگی میں ناکامی کے معاملات کی تحقیقات کررہے ہیں۔ اسی سلسلے میں رواں سال کے اوائل میں ای ڈی نے منی لانڈرنگ کی تحقیقات کے تحت، جبکہ ایس ایف آئی او نے مانڈکے فاو¿نڈیشن کے ڈائریکٹر کی حیثیت سے انہیں سمن جاری کیا تھا۔

Related Articles