وزیر اعلیٰ یوگی نے گاندھی جینتی پر کھادی آشرم سے خریداری کی، مصنوعات کا جائزہ لیا
لکھنؤ، اتر پردیش کے وزیر اعلیٰ یوگی آدتیہ ناتھ نے جمعہ کو بابائے قوم مہاتما گاندھی کی جینتی کے موقع پر حضرت گنج واقع گاندھی آشرم کا دورہ کیا۔ انہوں نے یہاں منعقد پروگرام میں شرکت کے ساتھ کھادی کی مصنوعات بھی خریدیں۔ وزیر اعلیٰ نے زعفرانی رنگ کا گمچھا خریدا اور اس کی باقاعدہ ادائیگی کی۔وزیر اعلیٰ نے گاندھی آشرم میں دستیاب مختلف کھادی مصنوعات کا جائزہ لیا اور ان کے بارے میں معلومات حاصل کیں۔ انہوں نے وہاں موجود لوگوں کو کھادی کی مصنوعات خریدنے کے لیے بھی ترغیب دی۔اس موقع پر وزیر اعلیٰ نے کھادی آشرم میں کام کرنے والے تمام افراد کی خیریت دریافت کی اور ان کے حالات کے بارے میں معلومات لیں۔ انہوں نے وہاں موجود بچوں کو چاکلیٹ بھی دی اور ان سے ان کی تعلیم سمیت دیگر امور کے بارے میں پوچھا۔ بچوں نے وزیر اعلیٰ کے پاؤں چھو کر ان سے آشیرواد لیا۔
پروگرام کے دوران نائب وزیر اعلیٰ برجیش پاٹھک، کابینی وزیر راکیش سچان، راجیہ سبھا رکن برج لال، قانون ساز کونسل کے رکن ڈاکٹر مہندر سنگھ، پون سنگھ چوہان، اتر پردیش ریاستی خواتین کمیشن کی نائب چیئرپرسن اپرنا یادو، بی جے پی کے مہا نگر صدر آنند دیویدی سمیت دیگر شخصیات موجود تھیں۔
