مودی نے آگر مالوا حادثے پر افسوس کا اظہار کیا، مہلوکین کے اہل خانہ کو دو دو لاکھ روپے معاوضے کا اعلان

نئی دہلی، وزیر اعظم نریندر مودی نے مدھیہ پردیش کے آگر مالوا ضلع میں بارش کے باعث بپھرے نالے میں کار بہہ جانے سے آٹھ افراد کی موت پر ہفتے کو افسوس کا اظہار کیا ہے۔ وزیر اعظم نے مہلوکین کے اہل خانہ کو وزیر اعظم قومی راحت فنڈ سے دو دو لاکھ روپے کی امدادی رقم دینے کا اعلان کیا۔وزیر اعظم کے دفتر نے ایکس پر پوسٹ میں کہا، ’’مدھیہ پردیش کے آگر مالوا میں پیش آیا حادثہ انتہائی تکلیف دہ ہے۔ میں اپنے عزیزوں کو کھونے والے لوگوں سے تعزیت کا اظہار کرتا ہوں۔‘‘مودی نے کہا کہ حادثے میں جان گنوانے والے ہر شخص کے قریبی عزیز کو وزیر اعظم قومی راحت فنڈ سے دو لاکھ روپے کی امدادی رقم دی جائے گی۔ انہوں نے کہا کہ زخمیوں کو 50 ہزار روپے دیے جائیں گے۔قابل ذکر ہے کہ آگر مالوا ضلع کے نل کھیڑا میں ماں بگلامکھی مندر کے قریب شدید بارش کے باعث نالہ بھر گیا تھا۔ اسی دوران اجین سے آئے اڈیشہ کے تیرتھ یاتریوں کو لے جانے والی کار پانی کے تیز بہاؤ میں بہہ گئی۔ حادثے میں تین بچوں سمیت آٹھ افراد کی موت ہو گئی۔بتایا گیا ہے کہ علاقے میں رات بھر ہوئی شدید بارش کے بعد نالے میں پانی کی سطح بڑھ گئی تھی، جس کے باعث یہ حادثہ پیش آیا۔