ممتا بنرجی کی ہدایت کے بعد ریاست کے مختلف علاقوں سے بڑی تعداد میں اسلحے برآمد۔کئی افراد گرفتار

کلکتہ،مارچ۔وزیراعلیٰ کی ہدایت کے بعد پولس انتظامیہ نے غیر قانونی طریقے سے بم اور دیگر دھماکہ خیز اشیا اور اسلحہ رکھنے والوں کے خلاف کارروائی تیز کردی ہے۔پولس نے مالدہ کے بعد ہابرا سے دو شرپسندعناصر کو گرفتارکرنے کے ساتھ ان کے پاس سے چار راؤنڈ گولہ بارود بشمول دو پائپ گن برآمد کیا ہے۔ گرفتار شرپسندوں میں پرشانت لودھ (56) اور کرن بسواس (38) ہیں۔ پرشانت کا گھر ہبرا بنی پور اتنا نیو کالونی علاقہ میں ہے۔ ہابرا پولیس نے پرشانت کو جمعرات کی رات ایک خفیہ اطلاع پر اس وقت گرفتار کیا جب وہ ہابرا بنی پور شمشان گھاٹ پر آتشیں اسلحہ فروخت کرنے جا رہا تھا۔ تلاشی لینے پر ایک پائپ گن اور گولہ بارود کے دو راؤنڈ گولی برآمد ہوئے۔ اس کے علاوہ ہبرا پولیس اسٹیشن سے ایک خفیہ اطلاع پر حبرا بیرا نواپلی علاقے میں کرن بسواس (38) کے گھر سے ایک پائپ گن اور دو راؤنڈ کارتوس برآمد ہوئے اور کرن کو گرفتار کرلیا گیا۔ زیر حراست افراد پر پہلے بھی متعدد سماج دشمن سرگرمیوں میں ملوث ہونے کا معاملہ چل رہا ہے۔ انہیں گرفتار کرکے جیل بھیج دیا گیا ہے۔ حراست میں لیے گئے افراد کو ہبرا پولیس نے بارسات کی عدالت میں پیش کیا۔دریں اثناءاس سے قبل پولس نے وزیر اعلیٰ کی ہدایت پر مالدہ کے چنچولے سے اسلحہ برآمد کیا ہے۔ وزیر اعلیٰ ممتا بنرجی نے رام پورہاٹ واقعہ کے بعد ریاست کے تمام تھانوں کی پولیس کو بم اور ہتھیار برآمد کرنے کی ہدایت دی ہے۔ اس حکم کے بعد مالدہ کے چنچل تھانے کی پولیس نے جمعرات کی رات دو الگ الگ گاؤں میں چھاپہ مار کر دو نوجوانوں کو دو پائپ گن اور دو کارتوس کے ساتھ گرفتار کیا ہے۔ ملزمان کو جمعہ کو چنچل سب ڈویژنل عدالت میں پیش کیا گیا۔ پولیس کے مطابق گرفتار ہونے والا 30 سالہ مروپ علی ہے جو چنچل کے موتیہار پور پنچایت کے باقی پور کا رہنے والا ہے۔ دوسرا انوپ مالو (20) ہے جو چنچل پنچایت کے پہاڑ پور علاقے کا رہنے والا ہے۔ پولیس نے دونوں کو ان کے گھروں سے آتشیں اسلحہ سمیت گرفتار کر لیا۔ گرفتار ہونے والوں میں پہاڑ پور کے رہائشی انوپ مالو کے خلاف ڈکیتی کا پرانا مقدمہ بھی شامل ہے۔اس دوران بشیرہاٹ پولیس نے علاقے سے دو بدنام زمانہ شرپسندوں کو آتشیں اسلحہ اور گولہ بارود کے ساتھ گرفتار کیا ہے۔ ان کے نام شفیق الغازی اور قیصرالغازی ہیں۔گذشتہ رات شفیق کو سولادانہ سے گرفتار کیا گیا اور قیصرال کو چمپا پوکر روڈ سے گرفتار کیا گیا ہے۔ بشیرہاٹ پولیس نے کل رات خفیہ اطلاع پر دونوں کو گرفتار کرلیا۔ ان کے پاس سے دو ریوالور اور ایک راؤنڈ گولہ بارود برآمد ہوا۔ آج انہیں بشیرہاٹ سب ڈویژنل کورٹ لے جایا گیا۔دوسری جانب نوڈا پولس نے دو افراد کو آتشیں اسلحے کے ساتھ گرفتار بھی کیا۔ پولیس نے انہیں جمعرات کی رات نوادہ کے بارانی علاقے سے گرفتار کیا ہے۔ ایک 9 ایم ایم پستول جس میں چار راؤنڈ گولہ بارود، ایک 7.75ایم ایم پستول اور ایک میگزین برآمد ہوا۔ انہیں جمعہ کو بہرام پور عدالت لے جایا گیا۔ پولیس حراست میں لے کر پوچھ گچھ کرکے یہ جاننے کی کوشش کر رہی ہے کہ اس واقعے میں اور کون کون ملوث ہے۔ گرفتار حسیب شیخ کا گھر نودر سوناتیکوری میں ہے اور پراتک بھومک کا گھر نادیہ کے دھنتلہ علاقے میں ہے۔