لاؤڈ اسپیکر نجی معاملہ، اسے مسئلہ بناناٹھیک نہیں: کمل ناتھ

بھوپال، اپریل ۔مدھیہ پردیش کے سابق وزیر اعلیٰ کمل ناتھ نے ان دنوں ملک میں چل رہے لاؤڈ اسپیکر تنازعہ پر آج کہا کہ یہ ایک نجی معاملہ ہے، اسے مسئلہ بنانا ٹھیک نہیں ہے۔حالانکہ صحافیوں سے بات چیت کے دوران مسٹر کمل ناتھ نے یہ بھی کہا کہ لاؤڈ اسپیکر کا غلط استعمال نہیں ہونا چاہیے، وہ اس سے اتفاق کرتے ہیں۔مسٹر کمل ناتھ آج مقامی رویندر بھون میں میڈیا سے بات چیت کر رہے تھے۔ اس دوران انہوں نے کہا کہ لاؤڈ اسپیکر نجی معاملہ ہے، اسے ایشو بنانا ٹھیک نہیں۔ لاؤڈ سپیکر سے لوگوں کے جذبات وابستہ ہیں لیکن اگر لاؤڈ سپیکر اشتعال انگیزی کر رہے ہیں تو ان کے خلاف کارروائی ہونی چاہیے۔ لاؤڈ سپیکر بہت سی جگہوں پر استعمال ہوتے ہیں لیکن وہ اس بات پر متفق ہیں کہ اس کا غلط استعمال نہیں ہونا چاہیے۔اس دوران انہوں نے بھارتیہ جنتا پارٹی (بی جے پی) اور ریاستی حکومت پر بھی حملہ کیا۔ ایک سوال کے جواب میں انہوں نے کہا کہ بی جے پی کو اپنی تنظیم کی فکر کرنی چاہئے، کانگریس کی تنظیم کی فکر کرنا چھوڑ دیں۔انہوں نے الزام لگایا کہ آج پوری ریاست بجلی اور کوئلے کے بحران سے پریشان ہے۔ کسان، تاجر اور طلبہ سب بجلی کے بحران سے پریشان ہیں۔ یہ سب پچھلے دو سال کی کرپشن کا نتیجہ ہے۔ انہوں نے کہا کہ موجودہ حکومت میں کوئی ڈیل کرپشن یا کمیشن کے بغیر نہیں ہوتی۔ حکومت نے کوئلے کے بحران سے نمٹنے کے لیے کوئی تیاری نہیں کی۔اس دوران انہوں نے یہ بھی کہا کہ جس طرح بی جے پی حکومت نے کورونا سے نمٹنے کے لیے کوئی منصوبہ بندی نہیں کی تھی، اسی طرح بجلی اور کوئلے کے بحران سے نمٹنے کے لیے بھی کوئی منصوبہ نہیں بنایا ۔