سونم وانگچک نے جنتر منتر پر احتجاج میں شامل نہ ہونے کی وجہ بتائی

سونم وانگچک نے جنتر منتر پر احتجاج میں شامل نہ ہونے کی وجہ بتائی
جموں، ۔ لداخ کے معروف ماہرِ تعلیم اور ماحولیاتی کارکن سونم وانگچک نے دہلی کے جنتر منتر پر ہونے والے سی جے پی کے احتجاج میں شرکت نہ کرنے کی وجہ بتاتے ہوئے کہا ہے کہ وہ ان دنوں لداخ میں جاری کاموں کو ترجیح دے رہے ہیں۔ انہوں نے سوشل میڈیا پلیٹ فارم ایکس پر ایک ویڈیو پیغام جاری کرکے واضح کیا کہ حکومت کی جانب سے رکاوٹیں ڈالے جانے کے باوجود وہ ملک کی سلامتی کے لیے اپنا کام جاری رکھیں گے۔ سونم وانگچک نے کہا کہ جس طرح دہلی میں نوجوان اپنے مطالبات کے لیے جدوجہد کر رہے ہیں، اسی طرح وہ بھی لداخ میں ماحولیاتی چیلنجز اور موسمیاتی تبدیلیوں سے پیدا ہونے والے خطرات سے نمٹنے کی تیاریوں میں مصروف ہیں۔
انہوں نے آنے والی سردیوں کے لیے تیاریوں کا ذکر کرتے ہوئے کہا کہ وہ اپنے کام سے پیچھے نہیں ہٹیں گے۔اپنے پیغام میں انہوں نے معروف شاعر فیض احمد فیض کے اشعار کا حوالہ دیتے ہوئے کہا کہ سیاست کے علاوہ بھی دنیا میں کئی اہم مسائل اور کام موجود ہیں۔ انہوں نے اپنی جدوجہد کو ماچس سے تشبیہ دیتے ہوئے کہا کہ انہوں نے چولہا جلانے کا کام کیا ہے اور اگر کبھی چولہا بجھ جائے تو لوگوں کو اس ماچس کو یاد کرنا چاہیے۔
سونم وانگچک نے احتجاج میں شامل افراد اور نوجوانوں سے اپیل کی کہ وہ امن کا دامن ہاتھ سے نہ چھوڑیں اور پُرامن طریقے سے اپنی جدوجہد جاری رکھیں۔ انہوں نے مختلف گروپوں کے رہنماؤں پر زور دیا کہ وہ متحد رہیں اور دانش مندی سے کام لیں۔ انہوں نے بالخصوص جنریشن زی کے نوجوانوں سے اپیل کی کہ وہ ہر حال میں پُرامن رہیں۔ ان کا کہنا تھا کہ عدم تشدد کا پیغام مہاتما گاندھی کی اہم تعلیمات میں شامل ہے، جسے آگے بڑھانے کی کوشش کی جانی چاہیے۔