ملک کو غیر مستحکم کرنے کی کوشش برداشت نہیں کی جائے گی : بی جے پی

نئی دہلی، بھارتیہ جنتا پارٹی (بی جے پی) کے قومی صدر نتن نوین نے راہل گاندھی، اروند کیجریوال اور اپوزیشن اتحاد پر سخت حملہ بولا ہے۔ انہوں نے الزام عائد کیا کہ اپوزیشن جماعتیں جمہوری مینڈیٹ کو تسلیم کرنے کے بجائے ملک میں عدم استحکام پیدا کرنے کی کوشش کر رہی ہیں۔ نوین نے کہا کہ ملک کے 140 کروڑ عوام امن اور ترقی کی راہ پر آگے بڑھ رہے ہیں، لیکن اپوزیشن کو ہندوستان کی ترقی اور خوشحالی راس نہیں آ رہی ہے۔ انہوں نے کہا کہ ملک کو غیر مستحکم کرنے کی کوشش کو برداشت نہیں کیا جائے گا۔
نتن نوین نے ہفتہ کے روز جاری کردہ بیان میں کہا کہ ملک میں دو ایسے سیاسی گروہ سرگرم ہیں جو انتشار اور بدنظمی کے مقابلے میں لگے ہوئے ہیں۔ ایک گروہ کی قیادت راہل گاندھی کی سربراہی والا اپوزیشن اتحاد کر رہا ہے، جبکہ دوسرے گروہ میں اروند کیجریوال کے رفقاء شامل ہیں۔ انہوں نے کہا کہ عوام اپوزیشن کی ان کوششوں کو دیکھ رہے ہیں اور جمہوریت میں عوامی مینڈیٹ کا احترام کرنا تمام سیاسی جماعتوں کی ذمہ داری ہے۔
بی جے پی صدر نے الزام لگایا کہ ملک کو غیر مستحکم کرنے کی کوششوں کے پسِ پشت سیاسی مقاصد کے ساتھ ساتھ غیر ملکی طاقتوں کا بھی ہاتھ ہے۔ انہوں نے کہا کہ ہندوستان عالمی بحرانوں کے باوجود ترقی کی راہ پر گامزن ہے اور خود کفیل نیز ایک بااختیار ملک کی حیثیت سے اپنی شناخت کو مستحکم کر رہا ہے۔ اپوزیشن کو یہ پیش رفت قبول نہیں ہو رہی ہے۔
نوین نے کہا کہ ہندوستان کی جمہوریت اور محبِ وطن عوام کی طاقت اپوزیشن کے ایسے ناپاک ارادوں کو کامیاب نہیں ہونے دے گی۔ انہوں نے خبردار کرتے ہوئے کہا کہ آئین اور جمہوریت کے نام پر جھوٹ پھیلا کر عوامی مینڈیٹ کو چیلنج کرنا دراصل عوام کی توہین ہے۔ نتن نوین نے کہا کہ وزیر اعظم نریندر مودی کی قیادت میں گزشتہ 12 برسوں کے دوران ملک کو خوف کے ماحول سے باہر نکالنے، دہشت گردی پر قابو پانے اور نکسل ازم کے خاتمے کی سنجیدہ کوششیں کی گئی ہیں۔ تاہم، انہوں نے الزام لگایا کہ کچھ لوگ اب بھی اربن نکسل ذہنیت کے ذریعے ملک کو غیر مستحکم کرنے میں مصروف ہیں۔نہوں نے کہا کہ راہل گاندھی اور اپوزیشن اتحاد کے رہنماوں کی زبان نیز آئینی اداروں کے تئیں ان کا رویہ ملک کے عوام دیکھ رہے ہیں۔ ہندوستان کے نوجوان آئین، جمہوریت اور ہندوستانی تہذیب کے تئیں پرعزم ہیں اور وہ اس قسم کی سیاست کو ہرگز قبول نہیں کریں گے۔ بی جے پی صدر نے کہا کہ مسلسل انتخابی شکستوں سے پیدا ہونے والی مایوسی کے سبب اپوزیشن ملک میں تناو کا ماحول پیدا کرنے کی کوشش کر رہی ہے۔ انہوں نے کہا کہ بھارتیہ جنتا پارٹی کے کارکنان عوام کے درمیان رہ کر ایسی کوششوں کا منہ توڑ جواب دیں گے۔
نوین نے یقین دلایا کہ وزیر اعظم مودی کی قیادت میں ملک کی ترقی کی رفتار کو برقرار رکھنے اور عوام کے اعتماد کو مزید مضبوط کرنے کے لیے بی جے پی پوری طرح پرعزم ہے۔ انہوں نے کہا کہ ملک کے اندر یا باہر سرگرم ایسی تمام طاقتوں سے سختی سے نمٹا جائے گا جو ہندوستان کے امن، استحکام اور ترقی کی راہ میں رکاوٹ بننے کی کوشش کریں گی۔