سنگاپور میں یو پی آئی لین دین کی سہولت کا منگل کو افتتاح ہوا

نئی دہلی، فروری۔ہندوستان اور سنگاپور کے درمیان موبائل ایپ کے ذریعہ بینکوں کو فوری رقم بھیجنے کی سہولت کا منگل کو افتتاح کیا جائے گا۔آج یہاں وزیر اعظم کے دفتر سے جاری کردہ ایک ریلیز کے مطابق ہندوستان کے ‘یو پی آئی اور سنگاپور کے ‘پے ناؤ ڈیجیٹل ادائیگی کے نظام کے انضمام کا باقاعدہ افتتاح 21 فروری کو صبح 11 بجے آئی ایس ٹی پر کیا جائے گا۔ وزیر اعظم نریندر مودی اور سنگاپور کے وزیر اعظم لی ہیسین لونگ ویڈیو کانفرنسنگ کے ذریعے تقریب میں شامل ہوں گے۔ اس سروس کا افتتاح ریزرو بینک آف انڈیا (آر بی آئی) کے گورنر شکتی کانتا داس اور سنگاپور کے بینکنگ ریگولیٹر مانیٹری اتھارٹی آف سنگاپور (ایم اے ایس) کے منیجنگ ڈائریکٹر روی مینن کریں گے۔ریلیز کے مطابق یہ دونوں ادائیگی کے نظام دونوں ممالک کے درمیان رقوم کی فوری اور کم لاگت کی منتقلی کو فعال کرنے کے لیے منسلک کیے جا رہے ہیں۔ اس سے سنگاپور میں ہندوستانی تارکین وطن، خاص طور پر تارکین وطن کارکنوں اور طلباء کو سنگاپور سے ہندوستان اور ہندوستان سے سنگاپور جلدی اور کم قیمت پر رقم منتقل کرنے میں بھی مدد ملے گی۔سنگاپور میں ہندوستانی نژاد تقریباً 4.4 لاکھ لوگ ہیں۔ اس کے علاوہ بڑی تعداد میں ہندوستانی وہاں روزگار، تعلیم اور دیگر مقاصد کے لیے رہ رہے ہیں۔فن ٹیک اختراعات کے لیے ہندوستان سب سے تیزی سے بڑھتے ہوئے ماحولیاتی نظام میں سے ایک کے طور پر ابھرا ہے۔ وزیر اعظم مودی کی قیادت میں ہندوستان کے ڈیجیٹل ادائیگی کے بنیادی ڈھانچے نے عالمگیریت میں اہم کردار ادا کیا ہے۔ وزیر اعظم نے اس بات پر زور دیا ہے کہ یو پی آئی کے فوائد صرف ہندوستان تک ہی محدود نہیں رہنا چاہئے بلکہ دوسرے ممالک کو بھی اس سے فائدہ اٹھانا چاہئے۔