دھنکھر نے گاندھی جینتی کےموقع پر ہم وطنوں کو مبارکباد دی

نئی دہلی، اکتوبر۔ نائب صدر جگدیپ دھنکھر نے بابائے قوم مہاتما گاندھی کی یوم پیدائش پر قوم کو مبارکباد دی ہے۔نائب صدر کے سکریٹریٹ کی طرف سے ہفتہ کو یہاں جاری ایک بیان میں کہا گیا ہے کہ نائب صدر جمہوریہ نے مہاتما گاندھی کی یوم پیدائش کے موقع پر ہم وطنوں کو مبارکباد دی ہے۔مسٹر دھنکھر نے کہاکہ ’’میں بابائے قوم کے یوم پیدائش گاندھی جینتی کے موقع پر ہم وطنوں کو دل کی گہرائیوں سے مبارکباد پیش کرتا ہوں۔‘‘ انہوں نے کہا کہ مہاتما گاندھی جدید ہندوستان کی سب سے بااثر شخصیات میں سے ایک ہیں۔ وہ آج بھی دکھی انسانیت کے لیے امید کی کرن ہیں۔ ناانصافی کے خلاف ان کے ستیہ گرہ، ان کی عدم تشدد تحریک نے دنیا بھر کے بے شمار لوگوں کو متاثر کیا۔ انسان کی فطری بھلائی پر ان کا یقین، سچائی پر ان کے ایمان کی آج پہلے سے زیادہ ضرورت ہے۔