اندور ملک میں آئی ٹی کی اگلی منزل ہوگی: شیوراج

اندور، جنوری ۔ مدھیہ پردیش کے وزیر اعلی شیوراج سنگھ چوہان نے کہا کہ اندور ملک میں آئی ٹی کی اگلی منزل ہو گی۔ صفائی اور بہتر کام کرنے کے ماحول کو ہم نے ایک برانڈ کے طور پر قائم کیا ہے۔ مسٹر چوہان نے یہ بات گلوبل انوسٹرس سمٹ سے پہلے صنعت کاروں اور سرمایہ کاروں کے ساتھ ون ٹو ون بات چیت میں کہی۔ مسٹر چوہان سے ڈالمیا بھارت گروپ کے پونیت ڈالمیا، گودریج انڈسٹریز کے نادر گودریج، اڈانی ایگرو آئل اینڈ گیس کے پرنو اڈانی، ٹاٹا انٹرنیشنل کے نوئل ٹاٹا، آئی ٹی سی گروپ کے سنجیو پوری، ایکسسینچر کی ریکھا مینن اور ریلائنس انڈسٹریز کے نکھل آر میسوانی نے یہاں برلینٹ کنونشن سینٹر میں ملاقات کی۔ چیف سکریٹری اقبال سنگھ بینس اور پرنسپل سکریٹری صنعتی پالیسی اور سرمایہ کاری کے فروغ منیش سنگھ موجود تھے۔ وزیر اعلیٰ نے کہا کہ صنعت اور سرمایہ کاری کے لیے آسان طریقہ کار، تعاون پر مبنی اور حوصلہ افزا رویہ اور بہتر رابطہ اور مناسب انفراسٹرکچر ریاست کو تمام شعبوں میں سرمایہ کاری کے لیے موزوں بناتا ہے۔ مسٹر چوہان کے ساتھ بات چیت میں ڈالمیا بھارت گروپ کے پونیت ڈالمیا نے ریاست میں سیمنٹ پلانٹ لگانے اور صحت مند کاربن سائیکل تیار کرنے کے لیے ریاست کی ویسٹ لینڈ پر درخت لگانے کی حوصلہ افزائی کرنے کی تجویز پیش کی۔ وزیر اعلیٰ نے کہا کہ سرمایہ کاری میں اس طرح کی اختراعات ریاست میں خوش آئند ہیں۔ مسٹر چوہان کے ساتھ ملاقات میں گودریج انڈسٹریز کے نادر گودریج نے ریاست میں بڑھتی ہوئی شہری کاری کے پیش نظر رئیل اسٹیٹ سیکٹر میں سرمایہ کاری کرنے کی خواہش ظاہر کی۔ اس کے ساتھ ایگرو کیمیکل انڈسٹری لگانے کے منصوبے سے آگاہ کیا۔ مسٹر گودریج نے کہا کہ ان کا گروپ ملان پور میں یونٹ کو بڑھا رہا ہے۔ یہ گروپ سی ایس آر کے تحت صحت کے شعبے میں سرگرمیوں میں اضافہ کرے گا۔ سیاحت کے شعبے میں امکانات کے بارے میں معلومات دیتے ہوئے وزیر اعلیٰ نے کہا کہ ریاست کی بڑھتی ہوئی فی کس آمدنی کی وجہ سے ریاست میں معاشی سرگرمیاں بڑھ رہی ہیں۔ چیف منسٹر کے ساتھ ون ٹو ون بات چیت میں اڈانی ایگرو آئل اینڈ گیس کے پرنو اڈانی نے کہا کہ ان کے گروپ کا ریاست میں معدنیات، توانائی، زراعت، قابل تجدید توانائی اور کوئلہ کے شعبوں میں 60,000 کروڑ روپے کی سرمایہ کاری کرنے کا منصوبہ ہے۔ مسٹر چوہان کے ذریعہ مقامی نوجوانوں کو روزگار میں ترجیح دینے کے بارے میں گفتگو کے دوران مسٹر اڈانی نے کہا کہ یہ ہمارا فرض ہے۔ یہ گروپ نوجوانوں کو ان کی ضروریات کے مطابق تربیت دینے کے لیے ریاست میں اسکل اپ گریڈیشن کی سرگرمیاں انجام دے گا۔ یہ گروپ ریاست میں ایک اسپتال قائم کرنے کا بھی منصوبہ رکھتا ہے۔ چوہان نے انہیں ریاست میں فوڈ پروسیسنگ یونٹس کے قیام کے امکانات سے بھی آگاہ کیا۔