اندرا گاندھی کے یومِ پیدائش پر کانگریس دفتر میں خراج عقیدت پیش کیا گیا

کشن گنج ہندستان کی سابق وزیر اعظم اور خاتون آہن کے نام سے مشہور آنجہانی اندرا گاندھی کے یومِ پیدائش کے موقع پر جمعرات کے روز ضلع کانگریس دفتر، کشن گنج میں خراجِ عقیدت اور یادگاری تقریب کا انعقاد کیا گیا۔ تقریب میں کشن گنج کے رکن اسمبلی محمد قمرالہدیٰ خصوصی طور پر موجود رہے۔اس موقع پر کانگریس رہنماؤں اور کارکنوں نے اندرا گاندھی کی تصویر پر گلپوشی کر انہیں خراجِ عقیدت پیش کیا اور ان کی خدمات کو یاد کیا۔تقریب سے خطاب کرتے ہوئے مقررین نے اندرا گاندھی کی شخصیت اور سیاسی خدمات پر روشنی ڈالتے ہوئے کہا کہ ملک کی ترقی، قومی اتحاد اور بین الاقوامی سطح پر ہندوستان کی مضبوط شناخت قائم کرنے میں ان کا اہم کردار رہا ہے۔ ان کی مضبوط قیادت، جرأت مندانہ فیصلے اور عوامی خدمت کے تئیں لگن ہمیشہ ملک کے لوگوں کے لیے مشعلِ راہ رہے گی۔
مقررین نے کہا کہ اندرا گاندھی نے اپنے سیاسی سفر کے دوران کئی چیلنجز کا سامنا کیا، لیکن ہمیشہ ملک کے مفاد کو ترجیح دی۔ ملک کے لیے ان کی تاریخی خدمات کو کبھی فراموش نہیں کیا جا سکتا۔تقریب کے اختتام پر ضلع کانگریس کمیٹی کے صدر شہاب العالم اختر نے پروگرام میں شریک صحافیوں، پارٹی عہدیداروں، سینئر کانگریسی رہنماؤں اور کارکنوں کا شکریہ ادا کیا۔ انہوں نے کہا کہ سبھی کے تعاون اور شرکت سے یہ پروگرام کامیابی کے ساتھ اختتام پذیر ہوا۔

Related Articles