امت شاہ کے خلاف ریمارکس میں جھارکھنڈ ہائی کورٹ نے راہول گاندھی کو راحت دی

رانچی،  فروری۔جھارکھنڈ ہائی کورٹ نے بی جے پی کے سابق صدر امت شاہ کے خلاف کانگریس کے سابق قومی صدر راہل گاندھی کے ریمارک سے متعلق ایک معاملے میں راحت دی ہے۔ عدالت نے اس معاملے میں راہل گاندھی کے خلاف رانچی سول کورٹ کی طرف سے جاری نوٹس پر روک لگا دی ہے۔ اس کے ساتھ ہی راہل گاندھی کے خلاف کسی بھی قسم کی کارروائی پر پابندی لگا دی گئی ہے۔ راہل گاندھی کے خلاف بی جے پی لیڈر نوین جھا کی جانب سے رانچی سول کورٹ میں شکایت درج کرائی گئی۔ اس سے پہلے نوین جھا نے راہل گاندھی کو قانونی نوٹس دے کر امیت شاہ کے خلاف اپنے ریمارکس پر معافی مانگنے کو کہا تھا۔ یہ معاملہ سال 2019 میں کانگریس کے اجلاس میں اس وقت کے قومی صدر امیت شاہ کے خلاف راہل گاندھی کے بیان سے متعلق ہے۔ راہل گاندھی نے کہا تھا کہ کانگریس میں قاتل قومی صدر نہیں بن سکتا، لیکن بی جے پی میں ایسا ممکن ہے۔ عدالت نے اس شکایت کا نوٹس لیا۔ اس معاملے کی سول کورٹ میں 4 فروری یعنی کل سماعت ہوئی۔ اسے منسوخ کرنے کے لیے راہل گاندھی نے ہائی کورٹ میں عرضی دائر کی۔ جھارکھنڈ ہائی کورٹ کے جج جسٹس امبوج ناتھ کی عدالت نے جمعہ کو اس معاملے کی سماعت کرتے ہوئے راہل گاندھی اور سول کورٹ کے نوٹس پر کارروائی روک دی۔ عدالت نے اس معاملے کی اگلی سماعت 17 فروری کو مقرر کی ہے۔ راہل گاندھی کی طرف سے ایڈوکیٹ پیوش چتریش اور ایڈوکیٹ دیپانکر رائے پیش ہوئے۔