چیف الیکشن کمشنر گیانیش کمار کے خلاف پریاگ راج میں احتجاج

پریاگ راج، ملک کے چیف الیکشن کمشنر گیانیش کمار کے خلاف ملک بھر میں احتجاج ہو رہے ہیں۔ اسی سلسلے میں پریاگ راج میں بھی شہری سماج نے آج پتھر گرجا گھر واقع دھرنا گاہ پر ایک روزہ دھرنا دیا۔ شہری سماج اور بائیں بازو کی تنظیموں سے وابستہ لوگوں نے ہاتھوں میں پوسٹر اور بینر لے کر چیف الیکشن کمشنر کے خلاف زوردار نعرے بازی کی۔
شہری سماج سے وابستہ لوگوں نے چیف الیکشن کمشنر گیانیش کمار کو برطرف کرنے اور ان کے خلاف مقدمہ درج کرکے فوجداری کارروائی شروع کرنے کا مطالبہ کیا ہے۔ اس کے ساتھ ہی ایس آئی آر کے پورے عمل کو منسوخ کرنے کا بھی مطالبہ کیا گیا ہے۔ شہری سماج کے لوگوں نے الزام لگایا ہے کہ ایک صحافی کے انکشاف کے بعد الیکشن کمیشن کی بے ضابطگیوں کا پردہ فاش ہو گیا ہے۔ اس لیے اب چیف الیکشن کمشنر گیانیش کمار کو اپنے عہدے پر برقرار رہنے کا کوئی اخلاقی حق نہیں ہے۔
دوسری جانب کانگریس نے بھی آج ہندوستان کے الیکشن کمیشن اور چیف الیکشن کمشنر گیانیش کمار کے خلاف محاذ کھول دیا ہے۔ کانگریس آج پوری ریاست میں چیف الیکشن کمشنر کے خلاف سڑکوں پر اتر کر احتجاج کر رہی ہے۔ سنگم نگری پریاگ راج میں بھی بالسن چوراہے پر گاندھی مجسمے کے پاس جمع ہوئے کانگریس کے رہنماؤں اور کارکنوں نے چیف الیکشن کمشنر گیانیش کمار کا پتلا نذر آتش کیا۔
الہ آباد پارلیمانی حلقے سے کانگریس کے رکن پارلیمنٹ اجول رمن سنگھ کی قیادت میں کانگریس کے رہنماؤں اور کارکنوں نے بالسن چوراہے پر واقع گاندھی مجسمے سے کلکٹریٹ تک پیدل مارچ کیا اور ضلع مجسٹریٹ کو میمورنڈم بھی سونپا۔ کانگریس رہنماؤں نے الزام لگایا ہے کہ بی جے پی کی ملی بھگت سے ہی ایس آئی آر کے ذریعے ووٹر فہرست میں بے ضابطگیاں کی جا رہی تھیں۔ اس لیے بی جے پی کو بھی اس کا جواب دینا چاہی