ٹیکسی آپریٹرز کی بے ضابطگی برداشت نہیں کی جائے گی: ساونت

پنجی، دسمبر۔ گوا کے وزیر اعلی پرمود ساونت نے پیر کو کہا کہ ان کی حکومت ٹیکسی آپریٹروں کی بے ضابطگی کو برداشت نہیں کرے گی۔مسٹر ساونت نے آج گوا کی یوم آزادی کے موقع پر اپنی تقریر میں کہا کہ حکومت ٹیکسی آپریٹرز کو سیاحت کی صنعت کا حصہ بنانا چاہتی ہے، لیکن سیاحوں کو ہراساں کرنے والوں کے خلاف سخت کارروائی کی جائے گی۔قبل ازیں نامہ نگاروں سے بات کرتے ہوئے مسٹر ساونت نے کہا کہ کچھ لوگ سیاحوں کا ناجائز فائدہ اٹھانے کی کوشش کر رہے ہیں لیکن حکومت اسے برداشت نہیں کرے گی۔دریں اثنا، بھارتیہ جنتا پارٹی کی گوا یونٹ کے ترجمان سیویو روڈریگس نے کہا کہ اگر ٹیکسی ڈرائیوروں کو کوئی شکایت ہے تو بھی اسے داداگیری سے حل نہیں کیا جا سکتا۔حالیہ دنوں میں تقریباً 100 سیاح ایک کروز جہاز سے اترے تھے، انہیں گوا میں اپنا سیاحتی دورہ منسوخ کرنا پڑا جب ٹیکسی آپریٹرز نے مبینہ طور پر ایک بس ڈرائیور سے بدتمیزی کی۔ ٹیکسی آپریٹرز نے مبینہ طور پر امریکی سیاحوں کو ریاست میں سیر کے لیے بسوں میں سوار ہونے کی اجازت نہیں دی۔ اس واقعہ پر انڈسٹری سمیت تمام حلقوں کی جانب سے تنقید کی گئی۔