مہاراشٹر حکومت ریاست میں سرمایہ کاری کے لیے سنجیدہ نہیں: راوت

ممبئی، جنوری۔ شیوسینا ٹھاکرے دھڑے کے سینئر لیڈر اور ایم پی سنجے راوت نے جمعرات کو مہاراشٹر میں شنڈے-فڑنویس حکومت پر ریاست میں سرمایہ کاری کرنے میں سنجیدہ نہیں ہونے کا الزام لگایا۔مسٹر راوت نے یہاں نامہ نگاروں کو بتایا کہ داؤس میں ہونے والی عالمی اقتصادی کانفرنس میں ملک کی تمام ریاستوں کے نمائندے حصہ لے رہے ہیں۔ چونکہ وزیر اعظم نریندر مودی 18 جنوری کو ممبئی کا دورہ کریں گے، نائب وزیر اعلی دیویندر فڑنویس نے اپنا داؤس کا دورہ منسوخ کر دیا ہے، جب کہ وزیر اعلیٰ ایکناتھ شنڈے داؤس کا دورہ جلد ختم کرنے کے بعد ریاست واپس آئیں گے۔انہوں نے کہا کہ وزیر اعظم صرف چند گھنٹوں کے لیے ممبئی آئیں گے اور درخواست پر وزیر اعظم کے دورے کی تاریخ تبدیل کی جا سکتی ہے، لیکن وزیر اعلیٰ نائب وزیر اعلیٰ کا مقصد شیوسینا کو شکست دینا اور ممبئی میونسپل کارپوریشن جیتنا ہے۔ اگر وزیراعظم سے درخواست کی جاتی تو وہ اپنے دورے کی تاریخ ملتوی کردیتے۔انہوں نے کہاکہ ملک بھر کی تمام ریاستوں کے نمائندے داؤس جا رہے ہیں لیکن ہماری ریاستی حکومت ان کا دورہ منسوخ کر رہی ہے کیونکہ وہ مہاراشٹر میں سرمایہ کاری کے لیے سنجیدہ نہیں ہے۔ انہوں نے الزام لگایا کہ وزیر اعلیٰ اور نائب وزیر اعلیٰ کو ریاست میں سرمایہ کاری سے زیادہ ممبئی میونسپل کارپوریشن انتخابات کی فکر ہے۔ ان کے لیے سیاست پہلے اور مہاراشٹر دوسرے نمبر پر ہے جبکہ یہ وزیر اعلیٰ اور نائب وزیر اعلیٰ کی ذمہ داری ہے۔مسٹر راوت نے کہا کہ ایک بار سرمایہ کاری چلی جائے تو وہ کبھی واپس نہیں آتی اور ریاست میں سرمایہ کاری کا گراف کافی حد تک گر گیا ہے اور لوگ سب کچھ جانتے ہیں۔