مانک ساہا نے تریپورہ کے 12ویں وزیر اعلیٰ کے طور پر حلف لیا
اگرتلہ، مئی۔تریپورہ میڈیکل کالج میں ڈینٹل سرجری کے پروفیسر مانک ساہا نے اتوار کو یہاں تریپورہ کے 12ویں وزیر اعلی کے طور پر حلف لیا۔گورنر ستیہ دیو نارائن آریہ نے 69 سالہ مسٹر ساہا کو دربار ہال میں ایک سادہ تقریب میں عہدے اور رازداری کا حلف دلایا۔مسٹر ساہا نے تنہا ہی حلف لیا کیونکہ وزیراعلی کی اچانک تبدیلی کے بعد قانون سازوں اور پارٹی کارکنوں میں بڑے پیمانے پر مبینہ عدم اطمینان کی وجہ سے پارٹی نے ابھی تک ان کی کابینہ کے اراکین کی فہرست کو حتمی شکل نہیں دی ہے۔نائب وزیر اعلیٰ جشنو دیو ورما اور رام پرساد پال سمیت تین سابق وزراء اور سابق وزیر اعلیٰ بپلب کمار دیو کی کابینہ میں شامل کئی ایم ایل اے حلف برداری کی تقریب سے دور رہے، مسٹر دیو حالانکہ رتن لال ناتھ اور آئی پی ایف ٹی لیڈر اور سابق شہری ترقی کے وزیر میوار کمار جماتیا اورکچھ دیگر اراکین اسمبلی اور بھارتیہ جنتا پارٹی (بی جے پی) کے لیڈروں کے ساتھ ساتھ حلف برداری کی تقریب میں پہنچے۔مسٹر ساہا نے حلف برداری کے بعد نامہ نگاروں سے کہاکہ ’’ہم پارٹی کے سپاہی ہیں۔ مجھے جو بھی کام سونپا جائے گا میں اسے اپنی صلاحیت کے مطابق پورا کروں گا۔ میں تریپورہ کی مجموعی ترقی کے لیے اپنی پوری کوشش کروں گا۔‘‘بی جے پی کی مرکزی قیادت کی ہدایات کے بعد مسٹر دیو نے ہفتہ کو عہدے سے استعفیٰ دے دیا تھا۔مسٹر ساہا دسمبر 2016 میں بی جے پی میں شامل ہوئے اور دو سال بعد پارٹی کے اقتدار میں آنے کے بعد 2019 میں تریپورہ کرکٹ ایسوسی ایشن کے صدر بنائے گئے۔ مسٹر ساہا نے جنوری 2020 میں مسٹر دیو کی جگہ بی جے پی کی تریپورہ یونٹ کے صدر کا عہدہ سنبھالا۔ مارچ 2022 میں وہ ریاست سے راجیہ سبھا کے لیے منتخب ہوئے۔مسٹر ساہا مسٹر دیو کے بہت وفادار کے طور پر جانے جاتے ہیں اور تریپورہ بی جے پی میں ان کا تیزی سے ابھرنا بڑی حد تک سابق وزیر اعلی کے ساتھ ان کے بہتر رشتوں کی وجہ سے ممکن ہوا ہے۔ہفتہ کو بی جے پی لیجسلیچر پارٹی کے لیڈر کے طور پر مسٹر ساہا کے نام کا اعلان مبینہ طور پر بی جے پی اور آئی پی ایف ٹی کے 41 ایم ایل اے کے خیالات کو نظرانداز کرتے ہوئے کیا گیا جس سے پارٹی میں بے اطمینانی پھیل گئی۔ بی جے پی کے دو ایم ایل اے۔ سابق وزراء رام پرساد پال اور پرمل دیو ورما – نے پارٹی کے فیصلے کے خلاف بغاوت کردی جب کہ دیو ورما ساہا کسی سے رابطے میں نہیں ہیں۔مسٹر ساہا نے گورنمنٹ ڈینٹل کالج پٹنہ سے ڈینٹل سرجری میں بیچلر کی ڈگری حاصل کی ہے اور یونیورسٹی رینکنگ میں چوتھا مقام حاصل کیا ہے۔ انہوں نے 1995 میں لکھنؤ یونیورسٹی کے کے جی ایم سی سے اورل اور میکسیلو فیشل سرجری میں ماسٹر ڈگری حاصل کی۔ انہوں نے تریپورہ ہیلتھ سروس میں بھی کام کیا اور بعد میں تریپورہ میڈیکل کالج میں ڈینٹل سرجری کے پروفیسر بنے۔