طب کا نوبل پرائز: لبنانی نڑاد امریکی اردم پاتاپوتیان اور ڈیوڈ جولیئس کے نام

بیروت/نوبل پرائز کمیٹی ،اکتوبر۔اس سال شعبہ طب اور فزیالوجی کا نوبل پرائز دو امریکی سائنسدانوں ڈیوڈ جولیئس اور اردم پاتاپوتیان کو دینے کا اعلان کیا گیا ہے۔ ان دونوں نے انسانی بدن کے ٹیمپریچر کی مناسبت سے اہم سائنسی دریافتوں کو عام کیا تھا۔نوبل پرائز کمیٹی کے سیکرٹری جنرل تھوماس پیرلمین نے رواں برس کے دنیا میں معتبر ترین قرار دیے جانے والے نوبل انعامات کے پہلے پرائز کا اعلان کیا۔نوبل کمیٹی کے مطابق ڈیوڈ جولیئس اور اردم پاتاپوتیان کو درجہ حرارت اور لمس یا چھونے کے احساس کے لیے ذمے دار ریسیپٹرز کی دریافت پر یہ انعام دینے کا فیصلہ کیا گیا۔نوبل کمیٹی نے مزید کہا کہ ان دونوں نے حقیقت میں فطرت کے مخفی راز آشکار کیے ہیں اور ان سے انسانی بقا کو تحفظ حاصل ہوا۔ انہی دونوں سائنسدانوں کو گزشتہ برس ایک اور اہم پرائز کاولی انعام برائے نیورو سائنسز سے نوازا گیا تھا۔اردم پاتاپوتیان نے انسانی درجہ حرارت جاننے کا ایک اور طریقہ وضع کیا، انہوں نے انسانی خلیے سے مکینیکل سینسر کی مدد سے ٹمپریچر معلوم کرنے کا پتہ چلایا۔ نوبل انعام کمیٹی نے ان دونوں طریقوں کو انسانی بقا کے تناظر میں نہایت اہم قرار دیا۔لبنانی نڑاد امریکی مولیکولر بیالوجی کے سائنسدان اردم پاتاپوتیان بنیادی طور پر آرمینیائی نسل سے تعلق رکھتے ہیں۔ انہوں نے نوبل انعام ملنے کا اعلان اپنے بیٹے کے ساتھ بستر پر لیٹے ہوئے سنا۔وہ ان دنوں اسکرِپس ریسرچ ادارے سے وابستہ ہیں۔ وہ کیلیفورنیا یونیورسٹی اور کیلیفورنیا انسٹیٹیوٹ آف ٹیکنالوجی سے تعلیم کے حصول میں وابستہ رہے۔ بنیادی تعلیم انہوں نے لبنانی دارالحکومت بیروت میں واقع امریکی یونیورسٹی سے حاصل کی تھی۔نوبل انعام کمیٹی کے مطابق پینسٹھ سالہ ڈیوڈ جولیئس نے مرچ کے ایک جزو کو تلاش کر کے انسانی اعصابی نظام میں موجود حرارت سے جسم کے اندرونی درجہ حرارت کے بارے میں بنیادی معلومات ظاہر کیں۔کیلیفورنیا یونیورسٹی کے برکلے کیمپس سے تعلق رکھنے امریکی سائنسدان ڈیوڈ جولیئس کو سن 2010 میں لائف سائنسز کا شاءپرائز بھی دیا جا چکا ہے۔ وہ مشہور امریکی درسگاہ میساچوسٹس انسٹیٹیوٹ آف ٹیکنالوجی کے فارغ التحصیل ہیں۔جولیئس نے مرچ میں موجود ایک عام سے جزو کیپسیسین کو دریافت کیا تھا اور اس کی مدد سے انسان میں پائی جانے والی غیر معمولی حرارت کو جاننے میں مدد ملی۔میڈیسن یا فزیالوجی کے بعد فزکس کے نوبل انعام کا اعلان کیا جاتا ہے۔ اس کا اعلان کل منگل پانچ اکتوبر کو کیا جائے گا۔ بدھ چھ اکتوبر کو کیمسٹری کے نوبل انعام یافتگان کے نام سامنے لائیں جائیں گے۔ادب یا لٹریچر کے نوبل انعام کا فیصلہ جمعرات سات اکتوبر کو کیا جائے گا۔ رواں ہفتے کے دوران نوبل انعام کا سلسلہ جمعے کو ختم ہو گا جب امن کے نوبل انعام کا اعلان نارویجین نوبل انسٹیٹیوٹ کرے گا۔ آخری نوبل پرائز کا تعلق اقتصادیات یا اکنامکس کے شعبے سے ہے۔ اس کے انعام کا اعلان اگلے پیر گیارہ اکتوبر کو کیا جائے گا۔معروف سائنس دان الفریڈ نوبل سے منسوب نوبل پرائز کا آغاز سویڈن کے مرکزی بینک نے کیا۔ سب سے پہلے یہ انعام 1901ء میں سائنس، ادب اور امن کے شعبوں میں دیا گیا تھا۔ بعد ازاں 1969 میں اس میں معاشیات کا شعبہ بھی شامل کیا گیا تھا۔