حکومت جوشی مٹھ بحران کو قومی آفت اعلان کرے: کانگریس

نئی دہلی، جنوری ۔ کانگریس نے کہا کہ جوشی مٹھ انسانی ساختہ آفت سے دوچار ہے اور ریاستی حکومت اس سے نمٹنے میں ناکام ثابت ہو رہی ہے، اس لیے اس بحران کو قومی آفت اعلان کیا جانا چاہیے۔کانگریس کے ترجمان پون کھیڑا، پارٹی کے اتراکھنڈ کے انچارج دیویندر یادو اور پارٹی لیڈر منیش کھنڈوری نے پیر کو یہاں پارٹی ہیڈکوارٹر میں ایک پریس کانفرنس میں کہا کہ جوشی مٹھ کی تباہی انسانوں کی بنائی ہوئی ہے اور ان تمام پروجیکٹوں پر جنہیں آفت کی وجہ مانا جارہا ہے کام کو فوری طور پر روک دیا جانا چاہئے۔ انہوں نے کہا کہ ریاستی حکومت نے آفت زدگان کے لیے 5000 روپے کے معاوضے کا اعلان کیا ہے۔ حکومت کا یہ اعلان مضحکہ خیز اور متاثرین کے ساتھ مذاق ہے۔ حکومت کو جوشی مٹھ کے بحران پر توجہ دینی چاہئے اور لوگوں کے مسائل کا فوری ازالہ کرنا چاہئے۔انہوں نے کہا کہ جوشی مٹھ کے لوگ احتجاج کر رہے ہیں اور لوگوں کا مطالبہ ہے کہ چاردھام اسکیم کے تحت ہیلانگ روڈ پر تعمیرات کو روکا جائے، ٹنل پر کوئی بلاسٹ نہ کیا جائے۔ علاقے کے لوگوں کا انشورنس کروا کر ایک رابطہ کمیٹی بنائی جائے اور مقامی لوگوں کو کمیٹی کا حصہ بناکر ریاستی حکومت سے بات کرنے کا اختیار دیا جائے۔کانگریس کے لیڈروں نے کہا کہ جوشی مٹھ میں خاندان تباہ ہو رہے ہیں، یہاں تک کہ جیوتیرمٹھ، لکشمی نارائن مندر، راجراجیشوری مندر سبھی میں دراڑیں پڑ گئی ہیں۔ لوگوں کے گھر تباہ ہو رہے ہیں، دکانیں ٹوٹ رہی ہیں، مندر ٹوٹ رہے ہیں لیکن حکومت بے حس بنی ہوئی ہے اور وزیر اعلیٰ صرف دو گھنٹے کے لیے جوشی مٹھ جا کر حالات کا جائزہ لیتے ہیں۔ انہوں نے کہا کہ اس معاملے میں لاپرواہی اختیار کیے بغیر حکومت کو جوشی مٹھ کے لیے خطرہ سمجھے جانے والے پروجیکٹوں کو فوری طور پر روک دینا چاہیے۔کانگریس کے لیڈروں نے کہا کہ منگل کو پارٹی کا ایک وفد چیف منسٹر سے ملاقات کرے گا اور گورنر کے سامنے اپنے خیالات بھی پیش کرے گا۔ انہوں نے کہا کہ پارٹی نے ایک کمیٹی تشکیل دی ہے، جو جوشی مٹھ میں لوگوں کے مسائل سنے گی اور انہیں حل کرنے کی کوشش کرے گی۔