جھارکھنڈ میں سی آئی ایس ایف اور کوئلہ چوروں کے درمیان تصادم میں چار ہلاک

رانچی، نومبر۔جھارکھنڈ میں ضلع دھنباد کے باگھمارا کے بی سی سی ایل بلاک II علاقے کی بینیڈیہ مین سائڈنگ میں کل دیر رات سی آئی ایس ایف اور کوئلہ چوروں کے درمیان مڈبھیڑمیں چار افراد ہلاک اور دو شدید زخمی ہو گئے۔اس کے علاوہ مڈبھیڑ میں دو فوجی زخمی بھی ہوئے۔ جاں بحق ہونے والوں میں شہزادہ خان، عطاءاللہ انصاری، پریتم چوہان اور سورج چوہان شامل ہیں۔ اس میں بادل راوانی اور رمیش رام شدید زخمی ہیں اور ابتدائی طبی امداد کے بعد انہیں رمس ریفر کر دیا گیا۔ ان کی حالت تشویشناک ہے۔کل رات تقریباً 50 لوگ بائک کے ساتھ بینیڈیہ مین سائڈنگ پر کوئلہ چوری کرنے آئے تھے جب ڈیوٹی پر موجود دو جوانوں نے کوئلہ چوروں کو روکا، اس دوران کوئلہ چوروں نے پٹرولنگ گاڑی پر فائرنگ کر دی اور پتھراؤ شروع کر دیا۔ جوانوں نے اپنے دفاع کے لیے چھ راؤنڈ فائر کئے۔ اس میں چار کوئلہ چور مارے گئے اور دو دیگر زخمی ہو گئے۔ پولیس نے چاروں کو پوسٹ مارٹم اور دو زخمیوں کو علاج کے لیے دھنباد بھیج دیا۔ چاروں لاشوں کا پوسٹ مارٹم مجسٹریٹ کی موجودگی میں کیا گیا۔