بی پرکاش مدیراج متفقہ طور پر تلنگانہ قانون ساز کونسل کے نائب صدرنشین منتخب

حیدرآباد,روری۔بی پرکاش مدیراج متفقہ طور پر تلنگانہ قانون ساز کونسل کے نائب صدرنشین منتخب کئے گئے ہیں۔ کونسل کے صدرنشین جی سکھیندر ریڈی نے آج اس خصوص میں اعلان کیاجس پر وزیراعلی کے چندرشیکھرراو نے پرکاش کو مبارکباد پیش کی۔بعد ازاں وزیراعلی اور دیگر فلورلیڈرس نے انہیں کرسی صدارت تک پہنچایا۔وزیراعلی نے انہیں گلدستہ پیش کیا۔ بعد ازاں وزیراعلی نے پرکا ش کے متفقہ طورپر انتخاب پر مسرت کا اظہار کیا۔انہوں نے کہا کہ وہ ماہر تعلیم کے طور پر جانے جاتے ہیں۔ انہوں نے کہا کہ وہ طالب علمی کے دوران سیاست میں سرگرم تھے۔ کونسل کے نائب صدرنشین کا عہدہ سنبھالنا فخر کی بات ہے۔ انہوں نے کہا کہ تلنگانہ کے عوام کو ان کی خدمات کی بہت ضرورت ہے۔وزیر انفارمیشن ٹکنالوجی کے تارک راما راو نے بھی پرکاش کو مبارکباد پیش کی۔ انہوں نے کہا کہ ان کا تجربہ ایوان کے لیے کارآمد ثابت ہوگا۔