تہواروں کے پیش نظر جموں شہر میں رونق دوبالا

موں،تہواروں کے موسم کے آغاز کے ساتھ ہی جموں شہر کے بازاروں میں خریداروں کی بھیڑ بڑھنے لگی ہے۔ نوراتری، دسہرہ، کروا چوتھ اور دیوالی کے پیش نظر لوگ بڑی تعداد میں خریداری کر رہے ہیں، جبکہ شادیوں کا سیزن قریب آنے سے بھی بازاروں میں گہما گہمی بڑھ گئی ہے۔ تاجروں کو اس بار اچھے کاروبار کی امید ہے۔
جموں شہر کے راج تلک روڈ، پرانی منڈی، لنک روڈ، پٹیل بازار، کھلونوں والی گلی، فتّو چگن، جین بازار اور رگھوناتھ بازار میں خریداروں کا خاصا رش دیکھا گیا۔ کئی مقامات پر بھیڑ اس قدر زیادہ تھی کہ لوگوں کو پیدل چلنے میں بھی دشواری پیش آئی۔بازاروں میں کپڑوں، زیورات، چوڑیوں، مہندی، آرائش و زیبائش کے سامان، تحائف اور پوجا کے لوازمات کی دکانوں پر خریداروں کی خاصی بھیڑ رہی۔ خریداروں کو متوجہ کرنے کے لیے دکانداروں نے خصوصی آفرز اور رعایتیں بھی شروع کر دی ہیں، جبکہ بازاروں کو تہواروں کے پیش نظر سجایا جا رہا ہے۔دکانداروں کے مطابق، ان دنوں کروا چوتھ کے پیش نظر خواتین کپڑوں، چوڑیوں، مہندی اور دیگر ضروری اشیاء کی خریداری میں مصروف ہیں۔ دوسری جانب شادیوں کی تیاریوں کے سلسلے میں بھی لوگ بازاروں کا رخ کر رہے ہیں۔تاجروں کا کہنا ہے کہ دھن تیرس اور دیوالی کے تہوار ابھی باقی ہیں، جس کے باعث آنے والے دنوں میں خریداری میں مزید تیزی آنے کی توقع ہے۔ انہیں امید ہے کہ تہواروں اور شادیوں کے سیزن سے کاروبار میں نمایاں اضافہ ہوگا۔